ჯანმრთელობის მსოფლიო ორგანიზაციის მონაცემებით, ამ დროისთვის, გაურკვეველი წარმოშობის მწვავე ჰეპატიტი გამოვლინდა 650 ბავშვში, 33 ქვეყანაში.
შემთხვევათა ყველაზე დიდი რაოდენობა გამოვლინდა დიდ ბრიტანეთში - 222 შემთხვევა და შეერთებულ შტატებში - 216.
მწვავე ჰეპატიტის შემთხვეები ასევე დაფიქსირდა დასავლეთ წყნარი ოკეანის, სამხრეთ-აღმოსავლეთ აზიისა და აღმოსავლეთ ხმელთაშუა ზღვის ქვეყნებში.
ინფექცია გამოვლინდა არგენტინაში, ავსტრიაში, ბელგიაში, ბულგარეთში, კანადაში, კვიპროსში, დანიაში, საფრანგეთში, საბერძნეთში, ინდონეზიაში, ირლანდიაში, ისრაელში, იტალიაში, იაპონიაში, მალდივებში, მექსიკაში, მოლდოვაში, ნიდერლანდებში, ნორვეგიაში, პალესტინაში, პანამაში, პოლონეთში, პორტუგალიაში, სამხრეთ კორეაში, რუმინეთში, სერბეთში, სინგაპურში, სლოვაკეთში, სლოვენიაში, ესპანეთსა და შვედეთში.
ჯანმო-ს ანგარიშში აღნიშნულია, რომ ბავშვებს უვითარდებათ ღვიძლის მწვავე უკმარისობა. ბავშვების ექვს პროცენტს ღვიძლის გადანერგვა დასჭირდა, ცხრა ბავშვი გარდაიცვალა.
ამასთან, ექსპერტებმა ჯერ ვერ დაადგინეს ინფექციის წყარო და პათოგენის გადაცემის გზები. ზოგიერთ პაციენტში აღმოაჩინეს ადენოვირუსი ან კორონავირუსი. თუმცა, არ არსებობს მტკიცებულება, რომ ჰეპატიტი ამ ვირუსების შემდეგ გართულების სახით ვლინდება. ჯანმო აგრძელებს ამ ჰიპოთეზის შესწავლას.
რას წერს ინფექციონისტი მაია ბუწაშვილი მწვავე ჰეპატიტზე
"ბოლო ხანებში დიდი ყურადღება ეთმობა ბავშვებში ახალი, გაურკვეველი წარმოშობის მწვავე ჰეპატიტის შემთხვევებს, რომლებიც დაფიქსირდა აშშ-ში და ევროპის რამდენიმე ქვეყანაში. შემთხვევათა რაოდენობა რამდენიმე ასეულს აღწევს. ასაკი 1-დან 16 წლამდე მერყეობს.
სიმპტომები, ჩვეულებრივ, მწვავე ჰეპატიტისთვის დამახასიათებელია: კანის და თვალის სკლერების სიყვითლე, საჭმლის მომნელებელი სისტემის მხრივ სიმპტომები, ღვიძლის ფუნქციების მკვეთრი მომატება. ტემპერატურა, როგორც წესი, ნორმალურია.
შემთხვევათა 90%-ზე მეტს ჭირდება ჰოსპიტალიზაცია. 10%-ზე მეტ შემთხვევებში დაავადება მძიმედ მიმდინარეობს და საჭირო ხდება ღვიძლის გადანერგვა. ნაწილი განკურნებით მთავრდება.
ჰეპატიტის მქონე ბავშვებში არ დასტურდება აქამდე ცნობილი არც ერთი ჰეპატიტის ვირუსი (A,B,C,D,E). დიდ ნაწილში გამოვლინდა ადენოვირუსის ერთ-ერთი ტიპი (ტიპი 41), ხოლო გარკვეულ ნაწილს დაესვა კოვიდის დიაგნოზი, ან ჰქონდათ ახლად გადატანილი კოვიდი. ზოგიერთს ერთდროულად აღენიშნებოდა ადენოვირუსული ინფექცია და კოვიდი.
არსებობს მოსაზრება, რომ ჰეპატიტის ეს ახალი ფორმა, შესაძლოა, ბავშვებში კოვიდის აქამდე ცნობილი ერთ-ერთი გართულების, მულტისისტემური ანთებითი სინდრომის (MIS-C) ერთ-ერთი გამოვლინება იყოს.
მოკლედ, ჯერ-ჯერობით ამ შემთხვევებთან დაკავშირებით ბევრი რამ უცნობია. მშობლებს აფრთხილებენ, რომ ყურადღებით იყვნენ და არ გამორჩეთ ბავშვებში სიყვითლის გამოვლინება და ასეთის შემთხვევაში დროულად მიმართონ სამედიცინო დახმარებას".
