რუსული გამოცემა "ვედომოსტის" ცნობით, სპორტული ტანსაცმლისა და ფეხსაცმლის მწარმოებელი უდიდესი კომპანია Nike რუსეთის ბაზარს ტოვებს.
"ვედომოსტის" ინფორმაციით, Nike-ს არ განუახლებია ფრენჩაიზის ხელშეკრულება Inventive Retail Group-თან, რომელიც ფლობს ყველაზე დიდ მაღაზიათა ქსელს რუსეთში Nike-ის ბრენდის ქვეშ.
Inventive Retail Group-ის პრეზიდენტი ტიხონ სმიკოვი თანამშრომლებისადმი მიწერილ წერილში, რომელიც გამოცემამ წაიკითხა, იტყობინება, რომ "ინვენტარის ამოწურვის გამო, IRG იძულებული იქნება დახუროს ყველა თავისი მაღაზია ამ ბრენდის ქვეშ".
გამოცემა აღნიშნავს, რომ უკრაინაში რუსეთის შეჭრის შემდეგ, Nike-მა შეაჩერა საქონლის მიწოდება და რუსეთში ონლაინ მაღაზიის ფუნქციონირება. ასევე დროებით დახურა ყველა მაღაზია, რომელიც მისი პირდაპირი კონტროლის ქვეშ იმყოფებოდა.
"ვედომოსტი" ხაზგასმით აღნიშნავს, რომ IRG-თან ფრენჩაიზის ხელშეკრულების განუახლებლობა შეიძლება ჩაითვალოს Nike-ის სრულად გასვლად რუსული ბაზრიდან.
ამავდროულად, BBC იუწყება, რომ რუსული ბაზრიდან გასვლის გადაწყვეტილება მიიღო ბრიტანულმა საცალო კომპანია Marks & Spencer-მა.
რუსეთის უკრაინაში შეჭრის შემდეგ, Marks & Spencer-მა განაცხადა, რომ წყვეტს საქონლის მიწოდებას რუსეთში, თუმცა მისივე თქმით, რუს პარტნიორებთან შეთანხმების პირობები არ იძლეოდა მაღაზიების სწრაფი დახურვის შესაძლებლობას.
ახლა უკვე, Marks & Spencer-მა, დეტალების დაზუსტების გარეშე, განაცხადა, რომ რუს პარტნიორებთან მოლაპარაკების შემდეგ იგი მთლიანად ტოვებს რუსეთის ბაზარს.
