საქართველოში უკრაინის საელჩოს წარმომადგენელმა ანდრეი კასიანოვმა საელჩოში ბრიფინგი გამართა, სადაც უკრაინის მიმართ საქართველოს პრეზიდენტის, ბიზნესისა და მოქალაქეთა მიერ გამოხატულ მხარდაჭერასა და ელჩის გაწვევის თაობაზე ისაუბრა.
ანდრეი კასიანოვმა საქართველოს პრეზიდენტს სალომე ზურაბიშვილს უკრაინის მხარდაჭერისა და სოლიდარობისთვის მადლობა გადაუხადა.
მისი თქმით, საელჩო ყურადღებით აკვირდება პრეზიდენტის პარლამენტში გამოსვლის შემდეგომ რეაქციებს და კიევს დეტალურ ინფორმაციას აწვდის.
"ჩვენ მადლობლები ვართ საქართველოს პრეზიდენტის, სალომე ზურაბიშვილის უკრაინისა და უკრაინელი ხალხისადმი სოლიდარობისა და მხარდაჭერისთვის, რაც მან გუშინ პარლამენტის ტრიბუნიდან გამოხატა. მადლობლები ვართ სრულიად საქართველოსი. ჩვენ ასევე ყურადღებით ვადევნებთ თვალს პარლამენტში გამოსვლის რეაქციებს პოლიტიკურსა და საზოგადოებრივ წრეებში და მუდმივად ვაცნობებთ კიევს ამის შესახებ", - თქვა კასიანოვმა.
კასიანოვის განცხადებით, უკრაინაში ომის დაწყების შემდეგ, საქართველოში უკრაინის 4 100 მოქალაქე ჩამოვიდა. მან ასევე იმედი გამოთქვა, რომ ამ საკითხთან დაკავშირებით, საქართველოს მთავრობა მიიღებს ყველა აუცილებელ ზომას.
"დაუზუსტებელი მონაცემებით, ომის დაწყებიდან საქართველოში ამ დროისთვის უკრაინის 4 100 მოქალაქე იმყოფება. უკრაინელები საქართველოში შემოსვლას 2022 წლის 24 თებერვლიდან იწყებენ. ისინი ძირითადად აგრესორი ქვეყნიდან გამორბიან. ჩვენი საელჩო ვაგრძელებთ მუშაობას, რათა უკრაინელ მოქალაქეებს ჰქონდეთ ყველაფერი, მათ შორის თავშესაფარი, სამედიცინო დახმარება, კვება, უფასო სატელეფონო კავშირი ოჯახთან. ვიმედოვნებთ, საქართველოს მთავრობა მიიღებს აუცილებელ გადაწყვეტილებებს. ჩვენ ასევე ვიმედოვნებთ, რომ მთავრობა მიიღებს საჭირო გადაწყვეტილებებს უკრაინის მოქალაქეებისთვის, რომლებიც იძულებით იმყოფებიან საქართველოს ტერიტორიაზე უკრაინულ-რუსული ომის გამო", – განაცხადა ანდრეი კაისანოვმა.
ისივე თქმით, დღევანდელი მდგომარეობით, უკრაინაში საქართველოდან გაგზავნილია 300 ტონაზე მეტი ჰუმანიტარული ტვირთი.
მან ასევე საქართველოში უკრაინის ელჩის დაბრუნების შესახებაც ისაუბრა. მისი თქმით, უკრაინის ელჩის მოვალეობის შესასრულებლად დაბრუნების შესახებ კიევი დაუყოვნებლივ აცნობებს საგარეო უწყებას.
"თქვენთვის ცნობილია, რომ უკრაინის ელჩი გაწვეული იყო პირველ მარტს კონსულტაციებზე. ელჩის საქართველოში დაბრუნების შესახებ თავისი მოვალეობის შესასრულებლად ჩვენ დაუყოვნებლივ ვაცნობებთ საქართველოს საგარეო საქმეთა სამინისტროს. ომის პირობებში, კონსულტაციები შეიძლება, ჩატარდეს სხვადასხვა ფორმატში. როგორც იცით, უკრაინაში სამი კვირაა, საომარი მდგომარეობაა და საქართველოში უკრაინის საელჩო აგრძელებს მუშაობას ომის პირობებში. ომის პირობებში დიპლომატია ასევე შორდება კლასიკურობას. ვერ გაგიმხელთ დიპლომატიური მუშაობის თავისებურებებს, მათ შორის, ომის დროს ელჩის მოღვაწეობას.
ასევე, მინდა ყურადღება მივაქციო შემდეგ საკითხზე – მიუღებლად მიგვაჩნია გუშინდელი მომხდარი შემთხვევა, როდესაც გადამღები ჯგუფი უმარკო მანქანით, ლოგოს გარეშე, პაპარაცულ სტილში ელოდა ელჩის მეუღლის გამოჩენას, როდესაც ის ბრუნდებოდა რეზიდენციაში და ამ დროს ჟურნალისტმა სცადა მისთვის კითხვების დასმა. მადლობელი ვართ რედაქტორების იმისთვის, რომ არ გაუშვეს ეს კადრები. ჩვენ მაქსიმალურად გახსნილი ვართ საუბრისთვის. გთხოვთ, მიმართოთ ჩვენ პრესსამსახურს და ვეცდებით, მაქსიმალურად სწრაფად და მაქსიმალურად სრულყოფილად, რამდენადაც შესაძლებელია, ომის ვითარებაში ყველა მიმართვაზე გიპასუხოთ", - განაცხადა კასანოვმა.
