28 იანვარი პერსონალურ მონაცემთა დაცვის საერთაშორისო დღეა!  სახელმწიფო ინსპექტორის სამსახური ამ მნიშვნელოვან თარიღს უკვე მეორე წელია კვირეულის სახით აღნიშნავს. სამსახურს დაგეგმილი ჰქონდა ცნობიერების ამაღლების კამპანიის მთელი ციკლი, მათ შორის: შეხვედრები თემატურ ჯგუფებთან, ახალგაზრდული კონკურსების გამოცხადება, ,,პერსონალურ მონაცემთა დაცვის ელჩების” მეორე ნაკადის შერჩევა და სხვა, რომელთა განხორციელება სამსახურის ირგვლივ განვითარებული მოვლენების გამო შეჩერდა.

მიუხედავად იმისა, რომ 2022 წლის 1 მარტამდე (სამსახურის გაუქმებამდე) ერთი თვე დარჩა, გვსურს ეს დრო თქვენს სასარგებლოდ გამოვიყენოთ.

შესაბამისად, ტრადიციისამებრ - 2022 წლის 24 იანვრიდან 28 იანვრის ჩათვლით - სამსახურის ვებგვერდისა და სოციალურ ქსელის საშუალებით წარმოგიდგენთ შემდეგ საინტერესო სიახლეებს:

24 იანვარი - სახელმწიფო ინსპექტორის გადაწყვეტილებების სახელმძღვანელოს (კრებულს) - შრომით ურთიერთობებში პერსონალურ მონაცემთა დაცვის საკითხებზე;

25 იანვარი - რეკომენდაციას სავაჭრო ორგანიზაციებისთვის - ,,პერსონალური მონაცემების დამუშავება ონლაინ ვაჭრობის პროცესში”;

26 იანვარი - რეკომენდაციას საგანმანათლებლო დაწესებულებებისთვის - ,,პერსონალურ მონაცემთა დამუშავება დისტანციური სწავლების პროცესში”;

27 იანვარი - დისტანციურ სასწავლო პლატფორმას პერსონალურ მონაცემთა დაცვის საკითხებზე;

28 იანვარი - გრაფიკულ ვიდეო-რგოლს - პერსონალური მონაცემების დაცვის მნიშვნელობის შესახებ.

მონაცემთა დაცვის საერთაშირისო დღე, 28 იანვარი, ევროპის საბჭომ 2006 წელს დააწესა. საქართველო ამ დღეს უკვე მეცხრედ აღნიშნავს.