უკრაინის საგარეო საქმეთა სამინისტრომ, საზღვაო ძალების მეთაურის სკანდალური განცხადებების გამო, გერმანიის ელჩი ანკა ფელდუზენი დაიბარა. ინფორმაციას უკრაინის საგარეო უწყება ავრცელებს.
"შეხვედრაზე ხაზგასმით აღინიშნა, რომ გერმანიის საზღვაო ძალების მეთაურის, კაი-ახიმ შონბახის განცხადებები, სადაც ის ამბობს, რომ ყირიმს უკრაინა ვერასდროს დაიბრუნებს და ჩვენი სახელმწიფო არ აკმაყოფილებს ნატოში გაწევრიანების კრიტერიუმებს, კატეგორიულად მიუღებელია.
ამასთან, ღრმა იმედგაცრუება გამოითქვა გერმანიის მთავრობის პოზიციასთან დაკავშირებით, რომელიც უკრაინისთვის იარაღის მიწოდების აკრძალვას ეხება", - ნათქვამია საგარეო საქმეთა სამინისტროს კომენტარში.
განცხადებაში ასევე ხაზგასმულია, რომ დღეს, როგორც არასდროს, მნიშვნელოვანია უკრაინისა და პარტნიორების სიმტკიცე და სოლიდარობა რუსეთის დესტრუქციული ზრახვების შესაკავებლად.
"აღინიშნა, რომ უკრაინა იმედოვნებს გერმანიის უფრო პროაქტიულ პოზიციას ჩვენი სახელმწიფოს მხარდასაჭერად, უკრაინის თავდაცვისუნარიანობის გაძლიერების საკითხებში, ფართომასშტაბიანი რუსული საფრთხის ფონზე", - ნათქვამია განცხადებაში.
მანამდე, უკრაინის საგარეო საქმეთა სამინისტრომ დაგმო გერმანელი ადმირალის განცხადება.
შეგახსენებთ, გერმანიის საზღვაო-სამხედრო ძალების მეთაურმა, ვიცე-ადმირალ კაი ახიმ შონბახმა ინდოეთის თავდაცვის კვლევების ინსტიტუტის მიერ ორგანიზებულ კონფერენციაზე განაცხადა, რომ ყირიმის ნახევარკუნძულს, დიდი ალბათობით, უკრაინა ვერასდროს დაიბრუნებს.
"ყირიმი წავიდა და აღარასდროს დაბრუნდება, ეს ფაქტია. ჩვენ უნდა ვიხელმძღვანელოთ რეალური მდგომარეობით და არა ემოციებით", - განაცხადა შენბახმა.
მოგვიანებით, ადმირალის განცხადებასთან დაკავშირებით, განარტება გააკეთა გერმანიის თავდაცვის სამინისტრომ.
უწყების განცხადებით, ადმირალს მოხსენების წარდგენა მოუწევს გერმანიის შეიარაღებული ძალების გენერალური ინსპექტორის წინაშე.
"ადმირალის განცხადება არანაირად არ შეესაბამება გერმანიის ფედერალური თავდაცვის სამინისტროს პოზიციას", - განმარტავს უწყების წარმომადგენელი.