უკრაინის საგარეო საქმეთა სამინისტრომ მკაცრად დაგმო და კატეგორიულად მიუღებელი უწოდა გერმანიის საზღვაო-სამხედრო ძალების მეთაურის განცხადებას.
"ყირიმის ნახევარკუნძული უკრაინამ შესაძლოა მხოლოდ გერმანელი ვიცე-ადმირალის წარმოსახვაში დაკარგოს. ყირიმი აუცილებლად დაუბრუნდება უკრაინას, კიევისა და მისი პარტნიორების ძალისხმევის წყალობით", - ნათქვამია უკრაინის საგარეო საქმეთა სამინისტროს განცხადებაში.
განცხადებაში ასევე აღნიშნულია, რომ კიევი დაინტერესებულია საკითხის გარკვევით, თუ როგორ შეესაბამება ვიცე-ადმირალის ეს განცხადება, გერმანიის მთავრობის თანმიმდევრულ პოზიციას.
საგარეო საქმეთა სამინისტრო მოითხოვს, რომ გერმანიის მთავრობამ საჯაროდ უარყოს საზღვაო ძალების მეთაურის განცხადება, რომელიც ძირს უთხრის უკრაინის სუვერენინტეტსა და ტერიტორიულ მთლიანობას, ასევე, ევროპაში უსაფრთხოების სტაბილურობისთვის გაწეულ მცდელობებს.
შეგახსენებთ, გერმანიის საზღვაო-სამხედრო ძალების მეთაურმა, ვიცე-ადმირალ კაი ახიმ შონბახმა ინდოეთის თავდაცვის კვლევების ინსტიტუტის მიერ ორგანიზებულ კონფერენციაზე განაცხადა, რომ ყირიმის ნახევარკუნძულს, დიდი ალბათობით, უკრაინა ვერასდროს დაიბრუნებს.
"ყირიმი წავიდა და აღარასდროს დაბრუნდება, ეს ფაქტია. ჩვენ უნდა ვიხელმძღვანელოთ რეალური მდგომარეობით და არა ემოციები", - განაცხადა შენბახმა.
მოგვიანებით, ადმირალის განცხადებასთან დაკავშირებით, განარტება გააკეთა გერმანიის თავდაცვის სამინისტრომ.
უწყების განცხადებით, ადმირალს მოხსენების წარდგენა მოუწევს გერმანიის შეიარაღებული ძალების გენერალური ინსპექტორის წინაშე.
"ადმირალის განცხადება არანაირად არ შეესაბამება გერმანიის ფედერალური თავდაცვის სამინისტროს პოზიციას", - განმარტავს უწყების წარმომადგენელი.
