გაერთიანებული სამეფოს მთავრობის გადაწყვეტილებით, 11 ოქტომბრიდან 47 ქვეყანა და ტერიტორია, მათ შორის საქართველო, კორონავირუსის ე.წ. "წითელ სიაში" აღარ იქნება.
11 ოქტომბრიდან აღნიშნული ქვეყნების მოქალაქეებს ინგლისში მოგზაურობისას სავალდებულო კარანტინის გავლა აღარ მოუწევთ.
აღსანიშნავია, რომ რეგულაციების შემსუბუქება შეეხება ინგლისში მოგზაურობის მსურველ იმ მოქალაქეს, ვინც ბრიტანეთი მარეგულირებლის მიერ დამტკიცებული ვაქცინით იქნება აცრილი. ეს ვაქცინებია - AstraZeneca, Pfizer-ი, Moderna და Janssen-ი. ამ პირობის არარსებობის შემთხვევაში, მოგზაურმა უნდა წარადგინოს კორონავირუსზე უარყოფითი ტესტი, გაიაროს 10-დღიანი თვითიზოლაცია და მე-2, მე-8 დღეს ჩააბაროს ტესტი.
მთავრობის ინფორმაციით, ამ გადაწყვეტილების გადახედვა ყოველ სამ კვირაში ერთხელ, ეპიდემიოლოგიური ვითარების გათვალისწინებით, მოხდება.
შეგახსენებთ, ბრიტანეთმა საქართველო "წითელ სიაში" 5 აგვისტოს შეიყვანა.
