"ყველასთვის საყურადღებოა ჰოსპიტალური და ჯანდაცვის სექტორის მდგომარეობა მიმდინარე პანდემიის პირობებში", აცხადებს ჯანდაცვის მინისტრის მოადგილე. თამარ გაბუნიას თქმით, შემთხვევების რაოდენობა მაღალი რჩება.
"გუშინ დადასტურებულია 5924 შემთხვევა, რაც გარკვეულწილად სამშაბათის ეფექტიც არის. საშუალოდ, დაახლოებით 4500-დან 5000-მდე მერყეობს შემთხვევების რაოდენობა გასული ერთი კვირის განმავლობაში. გასულ 24 საათში იყო გარდაცვალების 60 შემთხვევა. ჰოსპიტალურ სექტორში ამ დროისთვის არის 7410 პაციენტი, აქედან 1568 პაციენტი არის ინტენსიური თერაპიის განყოფილებაში, 376 პაციენტი იტარებს მკურნალობას რეანიმაციულ განყოფილებაში. საწოლი მობილიზებულია 8022, ეს არის მაქსიმალური დატვირთვა, თუმცა, ჰოსპიტალური სექტორი კიდევ ცდილობს დამატებითი საწოლის მობილიზებას სომატური განყოფილების პროფილის ცვლილების ხარჯზე.
ვაქცინაციის პროგრამა საკმაოდ აქტიურად მიმდინარეობს. გუშინ 30 ათასზე მეტი აცრა ჩატარდა, გასული ერთი კვირის საშუალო მაჩვენებელი არის დაახლოებით 25 ათასი, თუმცა იმისთვის, რომ ვაქცინაციის პროგრამამ გარდატეხა შეიტანოს პანდემიის მიმდინარეობაში, დაახლოებით 40 ათასი აცრა მაინც უნდა ტარდებოდეს დღის განმავლობაში. მიმდინარეობს მუშაობა, რომ ვაქცინაციის პროცესი კიდევ უფრო მეტად აქტიური გახდეს. აქტიური მობილიზება გრძელდება პირველადი ჯანდაცვის ქსელის, ოჯახის ექიმები მეტად ჩაერთვებიან პაციენტების ბინაზე მართვაში, დღეს აქტიური შემთხვევების რაოდენობა უკვე აჭარბებს 57 ათასს და ასეთი დიდი ნაკადის მართვას მეტი რესურსი სჭირდება, ამდენად, როგორც სოფლად, ასევე ქალაქში ოჯახის ექიმები მოსახლეობას მოემსახურებიან“,-განაცხადა გაბუნიამ.
