შეერთებული შტატების კონგრესის წარმომადგენელთა პალატამ მხარი დაუჭირა კანონპროექტს, რომლის თანახმადაც, ვაშინგტონი (კოლუმბიის ოლქი), ამერიკის დედაქალაქი, შესაძლოა, ქვეყნის 51-ე შტატი გახდეს.
კანონპროექტს სახელწოდებით - "რეზოლუცია 51" პალატის 216-მა დემოკრატმა კონგრესმენმა დაუჭირა მხარი, 208 წინააღმდეგ წავიდა.
რეზოლუცია იმისათვის, რომ ძალაში შევიდეს, სენატმაც უნდა მიიღოს და შემდგომ პრეზიდენტმა ხელი მოაწეროს. სენატში დემოკრატებს მინიმუმ 10 რესპუბლიკელი სჭირდებათ ინიციატივის დასამტკიცებლად.
მოელიან, რომ კანონპროექტი მტკიცე წინააღმდეგობას მიიღებს სენატში, რადგან რესპუბლიკელ სენატორები აცხადებენ, რომ იგი ეწინააღმდეგება შტატების კონსტიტუციას, რომლითაც კოლუმბიის ოლქი განსაზღვრულია როგორც ფედერალური ოლქი.
კანონპროექტის ამოქმედების შემთხვევაში ვაშინგტონი გახდება 51-ე შტატი სახელწოდებით - ვაშინგტონი, დუგლასის თანამეგობრობა. "თანამეგობრობა" აშშ-ის ოთხი შტატის ოფიციალურ დასახელებაში გვხვდება - ვირჯინია (ვირჯინიის თანამეგობრობა), კენტუკი, მასაჩუსეტსი და პენსილვანია.
კანონპროექტის თანახმად ახალი შტატის ტერიტორია მოიცავს ვაშინგტონის მთელ ტერიტორიას, გარდა ფედერალური სამთავრობო შენობებისა და მონუმენტებისა, მათ შორის თეთრი სახლი, კაპიტოლიუმი და უზენაესი სასამართლო. ისინი არ შევლენ შტატის ტერიტორიაზე და კვლავ დედაქალაქის კუთვნილება იქნება.
კანონპროექტის მომხრეები აცხადებენ, რომ ვაშინგტონის მაცხოვრებლები არ არიან წარმოდგენილები კონგრესში და ისინი ფორმალურად ფედერალურ ხელისუფლებას ექვემდებარებიან, ამიტომ აუცილებელია ქალაქის შტატად ფორმირება. ამ ინიციატივის დამტკიცების შემთხვევაში, დემოკრატებს ფაქტობრივად გარანტირებული ექნებათ კონგრესში ორი დამატებით მანდატის მიღება, რადგან ვაშინგტონი ტრადიციულად პროდემოკრატიული ქალაქია.
ცნობილია, რომ ბაიდენის ადმინისტრაცია მტკიცე მხარდაჭერას უცხადებს ამ ინიციატივას.