რუსეთმა უკრაინის მოსაზღვრე ტერიტორიებიდან და ანექსირებული ყირიმიდან სამხედრო ძალების გაყვანა დაიწყო.
რუსეთის თავდაცვის მინისტრის სერგეი შოიგუს ბრძანებით, "ქვეყნის სამხრეთ და დასავლეთ სამხედრო ოლქებში სამხედრო მზადყოფნის შემოწმების ღონისძიებები დასრულდა".
23 აპრილიდან უკრაინის სიახლოვეს გადასროლილი სამხედრო ძალები მუდმივი დისლოკაციის ადგილს დაუბრუნდებიან.
შოიგუს განცხადებით, საბრძოლო მზადყოფნის შემოწმების ღონისძიებებმა აჩვენა, რომ სამხედრო ძალებს სამშობლოს საიმედოდ დაცვა ძალუძთ.
"მოულოდნელი შემოწმების მიზნები სრულად მიღწეულია. შეიარაღებულმა ძალებმა აჩვენეს, რომ ქვეყნის თავდაცვის საიმედოდ უზრუნველყოფა შეუძლიათ. შესაბამისად, გადაწყვეტილება მივიღე, სამხრეთ და დასავლეთ სამხედრო ოლქებში შემოწმებითი ღონისძიებები დავასრულოთ", - განაცხადა სერგეი შოიგუმ.
სამხედრო მოქმედებებში, რომელსაც კრემლი საბრძოლო მზადყოფნის შემოწმების ღონისძიებებს უწოდებდა, ათი ათასზე მეტი სამხედრო, 40 საბრძოლო გემი და 20 დამხმარე ხომალდი იყო ჩართული.
რუსეთის სამხედრო ძალების უკრაინის საზღვრების სიახლოვესა და ანექსირებულ ყირიმში თავმოყრა აპრილის დასაწყისში დაიწყო. უკრაინის ხელისუფლების შეფასებით, თავის საზღვრებთან რუსეთის სამხედრო ძალების ამ მასშტაბის მოულოდნელი კონცეტრაცია, შესაძლოა ახალი აგრესიისთვის მზადებას უკავშირდებოდეს.
რუსეთის სამხედრო აქტივობის ზრდამ შეშფოთება გამოიწვია დასავლეთშიც. შეერთებული შტატები, საფრანგეთი, ბრიტანეთი, ევროკავშირი, გერმანია და ნატო რუსეთს მოუწოდებდნენ, უკან დაეხია თავისი სამხედრო ნაწილები.