პარტია "კანონი და სამართლის" ლიდერი თაკო ჩარკვიანი "ქართული ოცნების" მიერ კრისტიან დანიელსონის დოკუმენტზე ხელმოწერას ეხმიანება.
ჩარკვიანის განცხადებით, ოპოზიციის მიუღებელია დოკუმენტზე ხელმოწერა, სადაც პოლიტპატიმრები და ვადამდელი არჩევნები ნახსენები არ არის.
მისივე თქმით, ეს არ არის ბოლო დოკუმენტი და ხელისუფლებას კიდევ მოუწევს დათმობაზე წასვლა.
"მე არ მიმაჩნია, რომ ეს ბოლო დოკუმენტია და ამის იქით საუბარი არ იქნება, აუცილებლად იქნება და ხელისუფლებას მოუწევს დათმობა. დოკუმენტში არ არის ის ორი მთავარი პუნქტი, რისთვისაც ოპოზიციამ ეს ყველაფერი გააკეთა, მაგრამ მე არ მიმაჩნია, რომ ეს ბოლო დოკუმენტია და ამის იქით საუბარი არ იქნება. აუცილებლად იქნება და ხელისუფლებას აუცილებლად მოუწევს დათმობა იმიტომ, რომ დემოკრატიის გზაზე ასე სიარული არ შეიძლება. დოკუმენტი, სადაც პოლიტპატიმრებსა და ვადამდელ არჩევნებზე საუბარი არ არის, აბა ის რა დოკუმენტია, ეს არის შერჩევითი სამართალი", - განაცხადა თაკო ჩარკვიანმა.
შეგახსენებთ, პარლამენტის თავმჯდომარე არჩილ თალაკვაძემ განაცხადა, რომ "ქართული ოცნება" საჯაროდ მოაწერს ხელს კრისტიან დანიელსონის მიერ მომზადებულ დოკუმენტს.
კრისტიან დანიელსონმა საქართველოსთვის სამომავლო გზასთან დაკავშირებით საქართველოს პოლიტიკური პარტიების წარმომადგენლებს წინადადება 31 მარტს შესთავაზა.
