ვაშინგტონში, კაპიტოლიუმის მიმდებარე ტერიტორიაზე და თავად შენობაში ლოკდაუნი გამოცხადდა მას შემდეგ, რაც მის სიახლოვეს ავტომობილის მძღოლი შეეცადა ორი სამართალდამცავისთვის გადაევლო.
კაპიტოლიუმის პოლიციის ინფორმაციით, ეჭვმიტანილი დაკავებულია. "ასოშიეთიდ პრესი" იტყობინება, რომ თავდამსხმელს ესროლეს და ის საავადმყოფოში კრიტიკულ მდგომარეობაში გადაიყვანეს. პოლიცია ასევე აცხადებს, რომ „ორივე ოფიცერი დაშავებულია".
"სამივე მათგანი საავადმყოფოშია გადაყვანილი“, - განაცხადა კაპიტოლიუმის პოლიციამ. მოგვიანებით, გავრცელდა ცნობა, რომ თავდამსხმელი საავადმყოფოში გარდაიცვალა.
ადგილზე ათობით პოლიციის მანქანა და სამართალდამცავების დიდი რაოდენობაა მობილიზებული.
შენობასთან მისასვლელი გზა პოლიციას გადაკეტილი აქვს და შენობის თავზე ვერტმფრენები პატრულირებენ.