აშშ-ის დაავადებათა კონტროლის ცენტრის ყოფილი ხელმძღვანელი რობერტ რედფილდი ვარაუდობს, რომ კორონავირუსი ქალაქ უხანის ლაბორატორიიდან გავრცელდა. ამის შესახებ მან CNN-თან ინტერვიუში განაცხადა.
"ეს ჩემი მოსაზრებაა, მაგრამ მე ვირუსოლოგი ვარ და მთელი ცხოვრება ვირუსების შესწავლას მივუძღვენი. მე არ მჯერა, რომ ვირუსი ღამურიდან ადამიანს გადაეცა და ამ მომენტში იქცა ერთ-ერთ ყველაზე გადამდებ ვირუსად კაცობრიობის ისტორიაში. ჯერ კიდევ ვვარაუდობ, რომ ყველაზე რეალური თეორიაა, რომ ის ლაბორატორიიდან გავრცელდა", - განაცხადა რედფილდმა.
ამასთან, რედფილდი ფიქრობს, რომ კორონავირუსი ჩინეთში 2019 წლის შემოდგომიდან გავრცელდა.
რედფილდს არ დაუსახელებია არცერთი მტკიცებულება, რომელიც გაამყარებდა თეორიას, რომ კორონავირუსი ჩინეთის ქალაქ უხანის ლაბორატორიიდან გავრცელდა.