ჭყონდიდის ეპარქიაში, მარტვილის სამონასტრო კომპლექსის ერთ ერთი ეკლესიის ფრესკა დაზიანებულია.
ფრესკაზე კათოლიკოს პატრიარქი, ილია მეორეა გამოსახული. გადაღებულ ფოტომასალაში ჩანს, რომ ფრესკა პატრიარქის სახის ნაწილში გადაფხეკილია.
ამ დროისათვის უცნობია როდის, ვინ და რა ვითარებაში დაზიანდა გამოსახულება.
ფოტო: მთავარი არხი
შენიშვნა: მოგვიანებით, საპატრიარქოს საზოგადოებასთან ურთიერთობის სამსახური გამოეხმაურა გავრცელებულ ინფორმაციას და განცხადება გამოაქვეყნა. იხილეთ განცხადება:
"ჭყონდიდის ეპარქიიდან მოწოდებული ინფორმაციის საფუძველზე, საზოგადოებას განვუმარტავთ, რომ ზემოაღნიშნულ სამრეკლოში ვანდალიზმის ფაქტი არ დასტურდება.
როგორც ირკვევა, ამ სივრცეში რამდენიმე წლის წინ გადაწყდა მცირე ტრაპეზის მოწყობა და დაიწყო კედლების მოხატვაც, თუმცა მოგვიანებით სამუშაოები შეჩერდა. იქიდან გამომდინარე, რომ სამრეკლოს ეს სართული სარდაფის ტიპისაა, დროთა განმავლობაში ნესტმა კედლის მხატვრობა დააზიანა და გარკვეულ მონაკვეთებზე საღებავის ჩამოცვენა გამოიწვია.
შესაბამისად, გავრცელებული ინფორმაცია ვანდალიზმის შესახებ სიმართლეს არ შეესაბამება. ამ ეტაპზე მიმდინარეობს კედლის მხატვრობის ადგილზე გაცნობა, რომლის თაობაზეც დეტალურ ინფორმაციას დაწვრილებით მოგაწვდით", - ნათქვამია განცხადებაში.
