ძალიან უხერხულია საუბარი, თითქოს ჯანდაცვის სამინისტრო აპლიკაციის ფორმას სწორად ვერ ავსებს - განაცხადა ჯანდაცვის მინისტრის პირველმა მოადგილემ, თამარ გაბუნიამ მედიაში გავრცელებულ ინფორმაციასთან დაკავშირებით, რომ "საქართველომ ვაქცინის მისაღებად მოთხოვნები ვერ დააკმაყოფილა".
გაბუნიას განმარტებით, კოვაქსის წერილში, რომელიც გასულ თვეს ჯანდაცვის სამინისტროს მისწერა "ცალსახად მითითებულია გადავადების მიზეზი, რომელიც უკავშირდება „ფაიზერის“ მხრიდან დამატებით მოთხოვნას და არა ქვეყნის მზაობას".
"ძალიან უხერხულია იმაზე ლაპარაკი, რომ ჯანდაცვის სამინისტრო აპლიკაციის ფორმას სწორად ვერ ავსებს. ის, რაც წერია მედიაში გავრცელებულ განცხადებაში, იკითხება ცალსახად ისე, რომ ქვეყანამ ვერ შეასრულა კრიტერიუმი, რომელიც დააყენა "კოვაქსმა", რაც არ არის სწორი. ქვეყანამ მიიღო დამატებითი მოთხოვნები "ფაიზერისგან", ამას სჭირდება კიდევ დამატებითი მოლაპარაკება, სადაც დაზუსტდება ყველა პირობა, ორმხრივად მოეწერება ხელი, როგორც კი გვექნება დაზუსტებული ხელშეკრულებები. ყველაფერი არის მზად, რათა "ფაიზერისგან" დასტურის მიღებისთანავე ჩვენ გვქონდეს საბოლოო შეთანხმება. „კოვაქსი“ გააკეთებს განმარტებას, თუ რატომ მოხდა მისი განცხადების ასეთი ტიპის ინტერპრეტაცია", - განაცხადა თამარ გაბუნიამ.