ეცდებიან ნიკა მელიას დაჭერას, უი მაგათ პატრონს და თუ ვერ დაიჭერენ, ვაი მაგათ, ასეთ დღეში არიან, – ასე ეხმაურება ექსპრეზიდენტი მიხეილ სააკაშვილი „ნაციონალური მოძრაობის“ თავმჯდომარის, ნიკა მელიას საქმეს გირაოს გადახდასთან დაკავშირებით.
სააკაშვილის თქმით, ნიკა მელიას დაკავებას ქართველი ხალხი არ დაუშვებს.
„ქართველმა ხალხმა არ უნდა დაუშვას ნიკა მელიას დაპატიმრება. როგორც არ უშვებდნენ ამას უკრაინაში, ყირგიზეთში, თავის დროზე საქართველოში, როგორც არ უშვებენ ყველა თავმოყვარე ერსა და ქვეყანაში. ჩართეთ ტელევიზორი, იუთუბი და გაჩვენებთ, როდესაც ძალმომრეობას იჩენდა მთავრობა, როგორც იცავდა საკუთარ თავს ხალხი. თუ ძალმომრეობას იჩენს მთავრობა და ამას სამართალთან არანაირი კავშირი არ აქვს, მე ვფიქრობ, ქართველი ხალხი მონახავს ძალას, ორგანიზებულად, მშვიდობიანად, მაგრამ მტკიცედ არ დაუშვას ძალადობის გაგრძელება. ქართული საზოგადოება არის ღირსებით აღსავსე. ნიკა მელია გმირულად იქცევა, მაგრამ ახლა თითოეული ქართველი უნდა გახდეს ლიდერი და იყოს მოწოდების სიმაღლეზე. ცდიან მელიას დაჭერას, უი მაგათ პატრონს და თუ ვერ დაიჭერენ, ვაი მაგათ. ასეთ დღეში არიან. ეგენი თვითონ რომ არიან მხდალები, აქედანაც გადაწყვიტეს, რომ მხდალები არიან. საქართველო ამ ბრძოლაში გაიმარჯვებს, ეს არის საქართველოს ბრძოლა საქართველოს მტრებთან. ეს არის სინათლის და სიბნელის ბრძოლა, სადაც საბოლოო ჯამში, სინათლე გაიმარჯვებს“, – განაცხადა სააკაშვილმა.
