საფრანგეთის ხელისუფლების გადაწყვეტილებით, ქვეყანაში შინ დამზადებული პირბადეების ტარება აიკრძალა. იუწყება The Guardian-ი.
როგორც განმარტავენ, შინ დამზადებული პირბადეები საკმარისად არ იცავს ადამიანებს კორონავირუსის ახალი, უფრო მეტად გადამდები შტამებისგან.
საფრანგეთის ჯანდაცვის მინისტრის ოლივიე ვერანის განცხადებით, ხელისუფლება ამ გადაწყვეტილებამდე ჯანდაცვის ექსპერტების რეკომენდაციების გათვალისწინებით მივიდა.
"საზოგადოებრივი ჯანმრთელობის უმაღლესი საბჭო, ისევე როგორც მე, გირჩევთ, რომ არ ატაროთ შინ დამზადებული პირბადეები", - მიმართა ვერანმა მოსახლეობას.
მანამდე გავრცელდა ცნობა, რომ შინ დამზადებული პირბადეების ტარება არ იქნებოდა დაშვებული სამუშაო ადგილებზე.
ამიერიდან, საფრანგეთში მხოლოდ სამი სახეობის პირბადის ტარება იქნება დაშვებული - ქირურგიული პირბადე, FFP2 და სპეციალური ქსოვილისგან დამზადებული პირბადე, რომელსაც დაცვის რამდენიმე შრე აქვს.
FFP2 პირბადეების ტარება სავალდებულო სახით მანამდე გერმანიასა და ავსტრიაში შემოიღეს.