აფხაზი სეპარატისტები და რუსეთის შს სამინისტრო იატაკქვეშა ავტობიზნესის წინააღმდეგ ერთობლივად იბრძოლებენ, რომელიც ბოლო დროს ტრანსნაციონალურ ხასიათს იძენს. ინფორმაციას ამის შესახებ აფხაზური მხარე ავრცელებს.
მათივე ინფორმაციით, შესაბამისი შეთანხმება მიღწეულ იქნა დღეს გაგრაში რუსეთის შს მინისტრის რაშიდ ნურგალიევის, აფხაზ სეპარატისტთა ლიდერის სერგეი ბაღაფშის და აფხაზეთის ე.წ. შს მინისტრის ლეონიდ დზაფშბას შეხვედრაზე.
რუსეთის შს მინისტრმა განაცხადა, რომ ავტოსატრანსპორტო საშუალებებზე თავდასხმასთან ბრძოლა, ბოლო დროს უმნიშვნელოვანესი ხდება.
"რუსეთის შს სამინისტრო კომპლექსურ ღონისძიებებს ატარებს გატაცებული მანქანების ლეგალიზაციის გზების გადასაკეტად", _ განაცხადა ნურგალიევმა და დასძინა, რომ კრასნოდარის მხარეში ამ საკითხთან დაკავშირებით მდგომარეობა რთულია.
თავის მხრივ აფხაზ სეპარატისტთა ლიდერმა კი აღნიშნა, რომ ქმედითი ღონისძიებების გატარების გარეშე აფხაზეთი გატაცებული მანქანების ავტოსადგომი გახდება - "ეს კი აფხაზეთს არაფერში არ სჭირდება", _ აცხადებს ბაღაფში.
