Galt & Taggart-ის უფროსი ანალიტიკოსის მარიამ ჩახვაშვილის აზრით, საქართველოში ელექტროენერგიის ტარიფის ზრდა იმდენად დიდი არ ყოფილა, რომ ელენერგიის მოხმარება შეამციროს. მისივე თქმით, მოხმარების შემცირება, შესაძლოა, კომერციულ სექტორში შევნიშნოთ, თუმცა ესეც უმნიშვნელო მაჩვენებელი იქნება საერთო მოხმარების სურათში.
„3,5 თეთრი არ არის იმდენად დიდი ზრდა, რომ ელექტროენერგიის მნიშვნელოვანი შემცირება გვქონდეს. კომერციულმა სექტორმა შესაძლოა უფრო მეტად შეამციროს ელექტროენერგიის მოხმარება, მაგრამ ელენერგია ნაკლებად ელასტიური პროდუქტია – ან არის მისი საჭიროება, ან არ არის“, - მიიჩნევს Galt & Taggart-ის უფროსი ანალიტიკოსი.
სახელმწიფოს მხრიდან მოსახლეობისა და ბიზნესის მოწყვლადი ნაწილისთვის დენის ტარიფში სხვაობის სრულად და ნაწილობრივ სუბსიდირებას Galt & Taggart-ის უფროსი ანალიტიკოსი მარიამ ჩახვაშვილი მნიშვნელოვან ნაბიჯად აფასებს.
„მნიშვნელოვანია, რომ მოსახლეობას ტარიფის ზრდა 2021 წელს არ დააწვება ტვირთად. სახელმწიფო სუბსიდიის მთავარი აზრი ისაა, რომ კოვიდის პერიოდი გადააგოროს მოსახლეობამ და ბიზნესმა“, – აცხადებს ექსპერტი.
საქართველოს მთავრობა მოქალაქეებს, ელექტროენერგიის მომხმარებლების 95%-ს, რომლებიც მოიხმარენ 300 კვტ.სთ-მდე ელექტროენერგიას, დაუსუბსიდირებს არსებულ ტარიფსა და გაზრდილ ტარიფს შორის სხვაობას 2021 წლის განმავლობაში. ამასთანავე, ქ. თბილისში, ქ.მცხეთასა და ქ.რუსთავში გაზრდილი წყალმომარაგების ტარიფი დაუსუბსიდირდებათ სოციალურად დაუცველ ოჯახებს. ჯამში, მთავრობის სუბსიდიით 1.6 მილიონზე მეტი მოქალაქე ისარგებლებს. ასევე, მთავრობის გადაწყვეტილებით ტარიფებს შორის სხვაობის 50%-იანი სუბსიდირება შეეხება კვების მრეწველობის დარგსაც.
