საქართველოს ლეიბორისტული პარტიის ლიდერი შალვა ნათელაშვილი აცხადებს, რომ ოპოზიცია შეთითხნილ პარლამენტში შესვლას არ აპირებს. ამის შესახებ ნათელაშვილმა აშშ-ისა და ევროკავშირის ელჩებთან შეხვედრაზე შესვლამდე განაცხადა.
მისი თქმით, ოპოზიცია ივანიშვილისგან ახალი არჩევნების თარიღს ელოდება და მხოლოდ ამ თემაზე შეიძლება იყოს კონსულტაციები.
"მეგობარ ელჩთა ძალისხმევით გრძელდება კონსულტაციები ქვეყნის ღრმა პოლიტიკური კრიზისიდან გამოსაყვანად, სადაც ის შეიყვანა ხელისუფლებამ არჩევნების გაყალბებითა და ძალაუფლების უზურპაციით. ოპოზიციურ პარტიებს ხელი გვაქვს მოწერილი დეკლარაციაზე, რომლის თანახმადაც არ ვაპირებთ ამ გზით შეთითხნილ პარლამენტში შესვლას და ვითხოვთ ხელახალ არჩევნებს. შესაბამისად, ველოდებით ივანიშვილისგან ახალი არჩევნების თარიღს და მხოლოდ ამ თემაზე შეიძლება იყოს კონსულტაციები", - განაცხადა ნათელაშვილმა.
შეგახსენებთ, ევროკავშირისა და ამერიკის შეერთებული შტატების ელჩები ოპოზიციის წარმომადგენლებს ინდივიდუალურად ხვდებიან. შეხვედრა კელი დეგნანის რეზიდენციაში იმართება.