რეალურად "ქართული ოცნება" ამ არჩევნებს აგებს და წაგების მოლოდინში ყოველდღიურად კარგავს სახეს. ამის შესახებ "ერთიანი ნაციონალური მოძრაობის" ერთ-ერთმა ლიდერმა, სალომე სამადაშვილმა გამართულ ბრიფინგზე ისაუბრა, რითაც გამოეხმაურა ირაკლი კობახიძის განცხადებას, რომ ოპოზიცია ამზადებს მასალებს ისეთი პროგრამების გამოყენებით, რომლის მეშვეობით, ადამიანების ვიდეოგამოსახულების გაყალბებაც კი არის შესაძლებელი.
"ირაკლი კობახიძის მიერ გამართული ბრიფინგი, სადაც ტრადიციულად, როგორც „ქართულ ოცნებას" სჩვევია ვხედავთ, რომ არჩევნების წინ ხდება ოპოზიციის დადანაშაულება კანონსაწინააღმდეგო ქმედების დაგეგმვის თაობაზე. განსაკუთრებული აქცენტი კეთდება იმ მაჟორიტარულ ოლქებზე, სადაც "ქართული ოცნება" არის განწირული სრული კრახისთვის. მინდა ავხსნა რას ნიშნავს ირაკლი კობახიძის ეს ბრიფინგი, ვხედავთ, რომ რეალურად "ქართული ოცნება" ამ არჩევნებს აგებს და წაგების მოლოდინში ყოველდღიურად კარგავს სახეს. მათ არავინ აღარ დარჩათ მისი სახელით საუბრისა, გარდა იმ ოდიოზური ფიგურებისა, როგორიც არის კობახიძე და წულუკიანი.
"ქართული ოცნების" მხარდამჭერებიც კი, რომლებიც რაიმე ღირებულების გამო იყო მათ გუნდში ტოვებენ მათ რიგებს. მინდა საზოგადოებას ავუხსნა, რომ "ქართული ოცნების" მიერ დაქირავებული კოორდინატორებიც კი აღარ გეგმავენ, რომ მხარი დაუჭირონ ამ პოლიტიკურ ძალას. დარწმუნებული ვარ, საქართველოს მოქალაქეების დიდი უმრავლესობა არის საკუთარი ქვეყნის დიდი პატრიოტი და ყველა ძალიან კარგად ხედავს, რომ დღეს ჩვენი ქვეყნის გადარჩენის საქმეა "ქართული ოცნების" და ბიძინა ივანიშვილის რეჟიმის დამარცხება 31 ოქტომბერს", - ამბობს სალომე სამადაშვილი.
სამადაშვილი მოუწოდებს საზოგადოებას, რომ არ მიაქციონ ყურადღება ამ განცხადებებს.
"დღეს ჩვენ ერთადერთი ამოცანა გვაქვს, ძალიან მშვიდად, ყველა უსაფრთხოების წესების დაცვით, პირბადეების და ერთჯერადი საწერი კალმის გამოყენებით მივიდეთ არჩევნების დღეს და გავაკეთოთ ის არჩევანი რომელიც თქვენთვის არის მისაღები. ჩვენი არჩევანი აუცილებლად უნდა იყოს "ქართული ოცნების" და რუსეთის წინააღმდეგ. ჩვენ ამ არჩევნებში ერთად უნდა დავამარცხოთ რუსეთი და რუსი ოლიგარქი", - დასძენს სამადაშვილი.
მისივე თქმით, დღეს "ქართული ოცნების" ამოცანა არის, რომ შეაშინოს ხალხი და რაც შეიძლება ნაკლები ადამიანი მივიდეს არჩევნებზე.
"მინდა ვთხოვო ყველას, არ მოატყუებინოთ თავი "ქართულ ოცნებას". ყოველ ჯერზე, როცა გადაწყვიტავთ არ მიხვიდეთ არჩევნებზე, ამით თქვენ ხმას აძლევთ "ქართულ ოცნებას". ჩვენ ვემზადებით გამარჯვებისთვის, ხვალ ჩვენს მხარდამჭერებთან შეხვედრისთვის თბილისში, სადაც ყველა უსაფრთხოების ზომის დაცვით ჩვენ ბიძინა ივანიშვილს გავაფრთხილებთ იმაზე, თუ რა ელოდება 31 ოქტომბერს. ძალიან აქტიური კონსულტაციები გვაქვს ყველა საერთაშორისო პარტნიორებთან, ყოველდღიურ რეჟიმში ძალიან ბევრ ადამიანს ვესაუბრებით ვაშინგტონში და ბრიუსელში, საქართველოში წარმომადგენელ დიპლომატიურ მისიებს.
მინდა ბიძინა ივანიშვილს და მის გუნდს შევახსენო, რომ გაყალბებულ არჩევნებს და ქართველი ხალხისთვის თავისუფალი არჩევანის უფლების წართმევას მოყვება ძალიან მკვეთრი რეაქცია, მათ შორის ბიძინა ივანიშილის წინააღმდეგ. ამიტომ შეწყვიტეთ შესაძლო სანქციის რეჟიმის დაწესებით უსაფუძვლო ბრალდებები ოპოზიციის წინააღმდეგ, მოემზადეთ და მაქსიმალურად გააკეთეთ ყველაფერი, რაც შეიძლება გაკეთდეს დარჩენილ მოკლე დროში თავისუფალი და სამართლიანი არჩევნების უზრუნველსაყოფად. ამავე დროს მოემზადეთ ამ არჩევნების შედეგების უდრტვინველად და მშვიდად მისაღებად ისევე, როგორც ჩვენ ვემზადებით ამ არჩევნების მოსაგებად", - აცხადებს სამადაშვილი.