მთავრობამ ახალ კორონავირუსთან (SARS-Cov-2) გამოწვეულ ინფექციასთან (Covid-19) დაკავშირებით განთავსების სექტორის ოპერირებისთვის რეკომენდაციები გამოაქვეყნა. რეკომენდაციების ძირითადი დანიშნულება არის ვირუსის გავრცელების პრევენცია და თანამშრომლების და სტუმრების დაცვა შესაძლო ინფიცირებისგან.
რეკომენდაციების შემუშავება მოხდა საჯარო და კერძო სექტორის ძალიან მჭიდრო თანამშრომლობით, სადაც რეკომენდაციების შემუშავებაში სექტორის სხვადასხვა წარმომადგენლები იყვნენ აქტიურად ჩართულები. ამის შედეგად გამოქვეყნებული რეკომენდაციები ერთი მხრივ სრულად აკმაყოფილებენ მსოფლიო ჯანდაცვის ორგანიზაციის მოთხოვნებს ვირუსის პრევენციასთან დაკავშირებით, მაგრამ ამასთან ერთად განთავსების სექტორს აძლევენ შესაძლებლობას აღადგინოს ოპერირება და მიუხედავად არსებული შეზღუდვებისა, მოახდინონ სტუმრებისთვის საჭირო კომფორტის უზრუნველყოფა.
"ბოლო პერიოდში სხვადასხვა ქვეყნის მიერ გამოქვეყნებულ რეკომენდაციას ვადევნებდით თვალს და ვშიშობდით, რომ ჩვენთანაც კაბალური მოთხოვნები იქნებოდა, რომელიც არ მოგვცემდა სასტუმროს ეფექტურად წარმართვის შესაძლებლობას. თუმცა ტურიზმის ადმინისტრაციამ და დაავადებათა კონტროლის ცენტრმა ინდუსტრიასთან გამართეს დიალოგი, სადაც ჩვენ მოგვეცა საშუალება დაგვეფიქსირებინა ძირითადი თხოვნები, რომელიც სექტორში ჩართულ სხვადასხვა მონაწილეს - მსხვილსაც და მცირე ოჯახურ სასტუმროსაც - მისცემდა ოპერირების შესაძლებლობას და ბიზნესს კომერციულად კიდევ უფრო მეტად არ დააზარალებდა. არ შემიძლია არ ავღნიშნო მათი კოოპერაცია - თითქმის ყველა ჩვენი თხოვნა იქნა გათვალისწინებული საბოლოო რეკომენდაციებში. ეს თხოვნები ეხებოდა აუზების ამოქმედებას, კვების წერტილების ოპერირებას და სხვა მომსახურებას, რომელიც სექტორის მუშაობისთვის მნიშვნელოვანი იყო.
რა თქმა უნდა ინდუსტრიაც და სტუმრებიც უნდა ვაცნობიერებთ, რომ ეს არ არის ის თავისუფლება, რასაც ვიყავით შეჩვეულები და ჩვენ მოგვეთხოვება პირველ რიგში უსაფრთხოების ნორმების დაცვა, მაგრამ რეკომენდაციების ეს ფორმა გვაძლევს შესაძლებლობას, რომ ეტაპობრივად დავიწყოთ მუშაობა, ნელ-ნელა დავუბრუნდეთ საქმიანობას და პოსტ ვირუსულ პერიოდში ოპერირებამ ნაკლებად დააზარალოს სექტორი.
ვფიქრობ, რომ რეკომენდაციები არის ძალიან გონივრული - ხელი უნდა შევუწყოთ სოციალური დისტანციის დაცვას, უზრუნველეყოთ ვირუსის არ გავრცელება ხშირი დეზინფექციით და დასუფთავების სწორი პროცედურებით, დავიცვათ ჩვენი თანამშრომლები და სტუმრები გავრცელების პოტენციური რისკისგან. ეს რა თქმა უნდა დამატებით ხარჯებთან არის დაკავშირებული, მკვეთრად შემცირებულ მოთხოვნასთან ერთად ვვარაუდობ, რომ რამდენიმე თვე მთლიანად ინდუსტრიას ძალიან გაგვიჭირდება მუშაობა, მაგრამ ამ ეტაპზე მნიშვნელოვანია, რომ რაც შეიძლება მალე დავიწყოთ საქმიანობა მაქსიმალურად უსაფრთხო გზით. უნდა ვიმედოვნოთ, რომ მალევე იქნება შემუშავებული ვაქცინა, რომელიც უმოკლეს ვადებში აღადგენს ტურიზმს. ტურისტულ ინდუსტრიას აქვს ერთი ძალიან დადებითი მახასიათებელი - მოკლე მეხსიერება აქვს - ტურისტი უარყოფით მოვლენებს მალევე ივიწყებს და უბრუნდება მოგზაურობის ჩვეულ რეჟიმს. ვფიქრობ, რომ არც ეს კრიზისი იქნება გამონაკლისი.“ - აცხადებს Hotel Collection International-ის რეგიონალური ოფისის ხელმძღვანელი ქეთი მიქაშავიძე.