კერძო სექტორი მთავრობის მიერ სასტუმროებისთვის შემუშავებულ რეგულაციებს აფასებს. სასტუმროთა მფლობელი მაია მახათაძე ამბობს, რომ ამ რეგულაციებზე მუშაობა, რომელის შემუშავებაც COVID 19-ის გავრცელების პრევენციისთვის გახდა საჭირო, ბიზნესმა მთავრობასთან ერთად იმუშავა.
"საქართველოში ეპიდემიის გავრცელებისთანავე, შედგა პირდაპირი დიალოგი მთავრობასა და კერძო სექტორს შორის. შეხვედრის ინიციატორი გახლდათ ეკონომიკის სამინისტრო, კერძოდ მინისტრი ნათია თურნავა და ტურიზმის ეროვნული ადმინისტრაცია, კერძოდ ადმინისტრაციის ხელმძღვანელი მარიამ ქვრივიშვილი.
საკითხების სირთულიდან და მრავალრიცხოვნებიდან გამომდინარე, შეხვედრაზე გადაწყდა რომ მთლიანი ტურიზმი ჩაშლილიყო ქვე-დარგებად, ისეთებად როგორიცაა ცალკე სასტუმროები, კაფე-რესტორნები, ტურ-ოპერატორები, გიდები და სატრანსპორტო კომპანიები და შეხვედრები გაგრძელებულიყო უშუალო დარგთან მისი სპეციფიკიდან გამომდინარე.
ასეთი ტიპის შეხვედრებმა შედეგად დადო, პირველ რიგში უპრეცენდენტოდ ღია და გულწრფელი დამოკიდებულება, ხოლო მეორეს მხრივ საერთო, გაერთიანებული ხედვითა და რეკომენდაციებით გამოიკვეთა სამომავლო თანამშრომლობის ზოგადი სურათი
უკვე შედგენილი სტანდარტების დანერგვა გამოიწვევს პერსონალისა და სტუმრების უსაფრთხოების უმაღლეს ზომებს, მათთვის უსაფრთხო სამუშაო და დასასვენებელ გარემოსა და რაც მთავარია, გაზრდის ტურიზმის პოტენციალს, რადგან მოიმატებს მოგზაურის მხრიდან სფეროს მიმართ სანდოობა
უფრო სიღრმეებში თუ ჩავალთ და ცალ ცალკე ჩავშლით ნომრის მომსახურეობას და კვებას, მაშინ უფრო მარტივდება ცალკეული სერვისები, კონკრეტულად ვგულისხმობ:
! შვედური მაგიდიდან ინდივიდუალურ მომსახურეობაზე გადასვლა ნიშნავს, რომ ზუსტად გაიწერება სტუმარზე გასაცემი პორცია, რაც ვერ კონტროლდებოდა შვედურ მაგიდაზე და იწვევდა საუზმის ხარჯების გაორმაგებას, ანუ აქ დაიზოგება თანხა და საუზმის მომგებიანობა გაიზრდება.
! ნომრის დალაგება შესაძლებელია ახლებურად, ანუ მხოლოდ სტუმრის მოთხოვნის შემთხვევაში, რაც თავისთავად გამოიწვევს როგორც მომსახურე პერსონალის, აგრეთვე ჰიგიენის საშუალებების ხარჯის შემცირებას, რისი დაბალანსებაც თავისუფლად შესაძლებელია იმ საზოგადოებრივ ადგილებში, სადაც გაიზრდება მომსახურე პერსონალისა და ჰიგიენური საშუალებების საჭიროება.
შესაბამისად ქვეყანაში გვაქვს სტუმართ-მასპინძლობის სფეროს სტანდარტიზაცია, რაც ისედაც საჭირო იყო და ახალ რეალობაში უფრო მეტად შველაა, ვიდრე რაიმე დამატებითი ტვირთი",- განმარტავს მაია მახათაძე.