საქართველოს პრეზიდენტი სალომე ზურაბიშვილი ევროპარლამენტის წევრის, ანა ფოტიგას განცხადებას ეხმიანება, სადაც ის აცხადებს, რომ მიესალმება პოლიტიკური პატიმრების გათავისუფლებას.
"უფრო ზუსტად რომ ვთქვა, მე არ შემიწყალებია "პოლიტპატიმრები". საქართველოში პოლიტპატიმრები არ არიან. მადლობელი ვიქნები, თუ ამ გარემოებას მხედველობაში მიიღებთ საქართველოს ვითარების კომენტირებისას", - დაწერა სალომე ზურაბიშვილმა "ტვიტერზე".
15 მაისს, საქართველოს პრეზიდენტმა სალომე ზურაბიშვილმა თბილისის ყოფილი მერი გიგი უგულავა და თავდაცვის ყოფილი მინისტრი ირაკლი ოქრუაშვილი შეიწყალა.
პრეზიდენტის შეწყალების აქტს ანა ფოტიგა გამოეხმაურა და განაცხადა, რომ მიესალმება პრეზიდენტის მიერ პოლიტიკური პატიმრების შეწყალებას.