დიდი ბრიტანეთისა და ჩრდილოეთ ირლანდიის გაერთანებული სამეფოს დედოფალმა ელისაბედ მეორემ ბრიტანელი ერისადმი სატელევიზიო მიმართვა გაავრცელა.
უინძორის ციხე-სიმაგრეში ჩაწერილ მიმართვაში, დედოფალი ამბობს, რომ ბრიტანელი ერი დიდი გამოწვევის წინაშე დგას, რომელსაც მოაქვს მწუხარება, ფინანსური გაჭირვება და უზარმაზარი ცვლილებები.
დედოფალმა მადლობა გადაუხადა ბრიტანეთის ეროვნული ჯანდაცვის სამსახურის მუშაკებს და ყველა იმ ადამიანს, რომლებიც "თავდაუზოგავად აგრძელებენ ყოველდღიური მოვალეობების შესრულებას სახლის გარეთ, ყველას მხარდასაჭერად".
"დარწმუნებული ვარ, მთელი მოსახლეობა შემომიერთდება იმაში, რომ დაგარწმუნოთ, ჩვენ ვაფასებთ იმას, რასაც აკეთებთ და თქვენ მიერ შესრულებული რთული სამუშოს ყოველ საათს მივყავართ იქითკენ, რომ ყველაფერი ჩვეულ რიტმს დაუბრუნდეს", - მიმართა დედოფალმა მათ.
ელისაბედ მეორემ დაარწმუნა მოსახლეობა, რომ მათ წინ უკეთესი დღეები ელით.
"მალე ჩვენ ისევ ვიქნებით ჩვენს ოჯახებთან ერთად, ჩვენს მეგობრებთან ერთად და ჩვენ კიდევ შევხვდებით ერთმანეთს", - თქვა მისმა უდიდებულესობამ.
დედოფალმა აღნიშნა, რომ კორონავირუსით გამოწვეული გამოწვევა განსხვავდება წარსულში არსებული გამოწვევებისგან, რადგან ამან მთელი მსოფლიო გააერთიანა.
"ჩვენ ვუერთდებით მსოფლიოს დანარჩენი ქვეყნების საერთო ძალისხმევას. ჩვენ წარმატებას მივაღწევთ და ეს წარმატება ყველას გვეკუთვნის", - თქვა დედოფალმა.
დედოფალი ერისადმი მიმართვას ტრადიციულად საშობაოდ ავრცელებს, სხვა შემთხვევაში ეს ძალიან იშვიათად ხდება.
მანამდე დედოფალმა საგანგებო მიმართვა მხოლოდ ოთხჯერ გაავრცელა. პირველად ეს იყო სპარსეთის ყურის ომის დროს, 1991 წელს, მეორედ - უელსის პრინცესის, დიანას დაკრძალვისას, 1997 წელს და მესამედ, დედა დედოფლის, ელისაბედის გარდაცვალების დროს, 2002 წელს.
დედოფალმა კიდევ ერთი სატელევიზიო მიმართვა 2012 წელს, მისი მმართველობის საიუბილეო წელს გააკეთა.
