ის მოდელი, რომელზეც იყო საუბარი, არის მხოლოდ ავღანეთში, ერაყში და ალბათ, იმ ქვეყნებში ეს მოდელი, რა თქმა უნდა, შეძლებისდაგვარად მუშაობს, მაგრამ ეს მოდელი ჩვენი ქვეყნისთვის მისაღები ვერ იქნება, - განაცხადა იუსტიციის მინისტრმა, თეა წულუკიანმა ხელისუფლებას და ოპოზიციას შორის, დიპკორპუსის მონაწილეობით, მოლაპარაკების მესამე რაუნდის დასრულების შემდეგ.
მისი თქმით, ხელისუფლება მიიჩნევს, რომ წარმომადგენლობითობის ეს პრინციპი არ ვარგა საქართველოსთვის.
„მარტივად რომ ავხსნა, ოპოზიცია ითხოვს, ამ მოდელის ფარგლებში იმას, რომ მაგალითად, მესტიიდან ხარაგაულამდე იყოს მხოლოდ ერთი წარმომადგენელი ანუ მაჟორიტარი, დედოფლისწყაროდან ყაზბეგამდე მცხოვრებ ადამიანებს ჰყავდეთ ერთი მაჟორიტარი, გლდანს, ნაძალადევს და დიდუბეს ჰყავდეთ ერთი მაჟორიტარი. ჩვენ ვთვლით, რომ ეს წარმომადგენლობითობის პრინციპი არ ვარგა ჩვენი ქვეყნისთვის, მით უმეტეს, რომ ეს მოდელი არსებობს მხოლოდ ერაყსა და ავღანეთში. საქართველოში, რომელიც ევროპული ქვეყანაა, ეს მოდელი მისაღები ვერ იქნება, მით უმეტეს, რომ ჩვენ გვინდა, რაც შეიძლება მეტი მაჟორიტარი ანუ პასუხისმგებელი პირი ჰყავდეს.
ალბათ მომავალ შეხვედრაზე სრულიად ახალ ინიციატივაზე ვისაუბრებთ, შემდეგ შეხვედრაზე აღარ განვიხილავთ იმ ყველაფერს, რაზეც დღეის ჩათვლით ვიმსჯელეთ. საჭირო იქნება, რომ რაღაცა ახალი, სრულიად ახალი ინიციატივა გაჩნდეს... ეს არის იყო შეხვედრა შეხვედრისთვის, ჩვენ ძალიან ბევრი საათი მოვანდომეთ იმის ახსნას, რომ ის, რაც მისაღებია ავღანეთში, საქართველოში მისაღები არ არის", - ამბობს წულუკიანი.