საერთაშორისო უფლებადამცველი ორგანიზაცია Amnesty International-ი მიიჩნევს, რომ თბილისში, პარლამენტის შენობასთან მიმდინარე საპროტექტო აქციების დროს 18 და 26 ნოემბერს წყლის ჭავლის გამოყენების აუცილებლობა არ არსებობდა და შესაბამისმა ორგანოებმა ყველა ფაქტორი არ გაითვალისწინეს.
"არსებულ კონტექსტში, შეკრებები, რომლებიც საქართველოს პარლამენტის შესასვლელებს ბლოკავდა, მხოლოდ იმ შემთხვევაში შეიძლება დაიშალოს, თუ ხელისუფლება ამის გარდაუვალ აუცილებლობას დაამტკიცებს და მხოლოდ მაშინ, როდესაც დემონსტრაციამ ხანგრძლივი დროის განმავლობაში მნიშნველოვანი შეფერხება გამოიწვია.
18 და 26 ნოემბერს ამის საჭიროება არ იდგა, რადგან პარლამენტის შენობაში შესასვლელები მომიტინგეების მიერ მხოლოდ რამდენიმე საათის განმავლობაში იყო გადაკეტილი.
წყლის ჭავლის გამოყენება არც პროპორციული იყო და არც აუცილებელი. მისი გამოყენება მხოლოდ იმ ვითარებაშია აუცილებელი, როდესაც ძალადობამ მიაღწია იმ დონემდე, როდესაც სამართალდამცავები ვერ ახერხებენ ამის შეკავებას, მხოლოდ ძალადობაში ჩართული ადამიანების დაკავებით.
წყლის ჭავლის გამოყენება უნდა ითვალისწინებდეს გარემო ფაქტორებს, მაგალითად ცივი ამინდი, რამაც შეიძლება გაამძაფროს ის ზიანი, რაც შეიძლება მიადგეთ დემონსტრანტებს.
ჭავლი არ უნდა იყოს მიმართული მცირე მანძილიდან, რადგან ის ზრდის რისკს იმისას, რომ შეიძლება გამოიწვიოს სხეულის დაზიანება ან სიბრმავე", - წერია განცხადებაში.
