გაეროს გენერალური მდივანი ანტონიო გუტიერეში მიესალმება საქართველოს საგარეო საქმეთა მინისტრ დავით ზალკალიანსა და რუსეთის საგარეო საქმეთა მინისტრ სერგეი ლავროვს შორის, შვეიცარიის კონფედერაციის ინიციატივით, გამართულ შეხვედრას, რომელიც გაეროს გენერალური ასამბლეის ფარგლებში, ნიუ იორკში გაიმართა.
ამის შესახებ ნათქვამია გაეროს გენერალური მდივნის პრესსპიკერის განცხადებაში.
"გენერალური მდივანი დადებითად აფასებს შვეიცარიის ინიციატივას და ის იმედოვნებს, რომ შეხვედრა ხელს შეუწყობს რეგიონში მშვიდობასა და უსაფრთხოებას", - ნათქვამია განცხადებაში.
შეგახსენებთ გაერო-ს გენერალური ასამბლეის 74-ე სესიის ფარგლებში შვეიცარიის კონფედერაციის ინიციატივითა და ორგანიზებით გაიმართა საქართველოს საგარეო საქმეთა მინისტრის დავით ზალკალიანის და რუსეთის ფედერაციის საგარეო საქმეთა მინისტრის სერგეი ლავროვის შეხვედრა.
საქართველოს საგარეო საქმეთა სამინისტროს ცნობით, შეხვედრაზე ქართული მხარის მიერ დაისვა საქართველოს ტერიტორიების დეოკუპაციის საკითხი, საუბარი შეეხო არსებული უსაფრთხოების გარემოსა და ოკუპირებულ ტერიტორიებზე განვითარებული პროცესებს, ასევე საქართველო-რუსეთის ურთიერთობებში არსებულ პრობლემურ საკითხებს.
