"დიალოგი არის მშვიდობიანი დავის მოგვარების გასაღები, რომელსაც ევროკავშირი სრულად უჭერს მხარს", - ასე ეხმიანება ევროკავშირი დავით ზალკალიანსა და სერგეი ლავროვს შორის გამართულ შეხვედრას.
"საქართველოსა და რუსეთის საგარეო საქმეთა მინისტრებს შორის დღევანდელი შეხვედრა მნიშვნელოვანი შესაძლებლობა იყო რეგიონის უსაფრთხოების საკითხების განსახილველად, საქართველო-რუსეთის ურთიერთობებში დაძაბულობის შესამცირებლად და ყურადღების გასამახვილებად იმ საკითხზე, თუ რა გავლენას ახდენს ეს დაძაბულობა მოქალაქეებზე.
დიალოგი არის მშვიდობიანი დავის მოგვარების გასაღები, რომელსაც ევროკავშირი სრულად უჭერს მხარს.
მნიშვნელოვანია, რომ ყველა აქტორმა საქართველოში იმოქმედოს კონსტრუქციოლად კონფლიქტის შედეგად დაზარალებული ადამიანების მდგომარეობის შემსუბუქების მიზნით. ხაზგასასმელია ის, რომ დაცული უნდა იყო ადამიანის უფლებები, მათ შორის გადაადგილების თავისუფლება.
ევროკავშირი კიდევ ერთხელ გამოხატავს მტკიცე მხარდაჭერას საქართველოს სუვერენიტეტისა და ტერიტორიული მთლიანობისადმი, საერთაშორისოდ აღიარებულ საზღვრებში“, - ნათქვამია ევროკავშირის მიერ გავრცელებულ განცხადებაში.
შეგახსენებთ გაერო-ს გენერალური ასამბლეის 74-ე სესიის ფარგლებში შვეიცარიის კონფედერაციის ინიციატივითა და ორგანიზებით გაიმართა საქართველოს საგარეო საქმეთა მინისტრის დავით ზალკალიანის და რუსეთის ფედერაციის საგარეო საქმეთა მინისტრის სერგეი ლავროვის შეხვედრა.
საქართველოს საგარეო საქმეთა სამინისტროს ცნობით, შეხვედრაზე ქართული მხარის მიერ დაისვა საქართველოს ტერიტორიების დეოკუპაციის საკითხი, საუბარი შეეხო არსებული უსაფრთხოების გარემოსა და ოკუპირებულ ტერიტორიებზე განვითარებული პროცესებს, ასევე საქართველო-რუსეთის ურთიერთობებში არსებულ პრობლემურ საკითხებს.
