ბიძინა ივანიშვილის განცხადებიდან რა განცდაც მაქვს, არის ის, რომ მოსამართლეთა შერჩევის პროცესი წავა სწორად და ეს არის ყველაზე მნიშვნელოვანი, - ამის შესახებ პარლამენტის ვიცე-სპიკერმა თამარ ჩუგოშვილმა "ქართული ოცნების" ლიდერია ბიძინა ივანიშვილის განცხადებასთან დაკავშირებით აღნიშნა.
მისი თქმით, ამ განცხადებაში აქცენტი იყო გაკეთებული იმაზე, რომ ამ პროცესს პარლამენტმა სათანადო გულისხმიერება უნდა დაუთმოს.
"ამ განცხადებაში ჩემთვის ერთ-ერთი მნიშვნელოვანი აქცენტი იყო პროცესთან დაკავშირებით. ჩემთვის ერთ-ერთი მთავარი არის, რომ სწორი პროცესით შევარჩიოთ მოსამართლეები. უზენაესი სასამართლოს მოსამართლეების დანიშვნა იქნება ყველაზე საპასუხისმგებლო გადაწყვეტილება, რაც ამ მოწვევის პარლამენტს მოუწევს, რომ მიიღოს. ამ განცხადებაშიც აქცენტი იყო გაკეთებული იმაზე, რომ ამ პროცესს პარლამენტმა სათანადო გულისხმიერება უნდა დაუთმოს. ამ განცხადებიდან რა განცდაც მაქვს, პროცესი წავა სწორად და ეს არის ყველაზე მნიშვნელოვანი, რადგან მოსამართლეების შერჩევის პროცესი უნდა იყოს ჯანსაღი. მოლოდინი მაქვს, რომ ამ განცხადების შემდეგ პროცესი წარიმართება სწორად, ჯერ კანონის მიღებით და შემდეგ ამ კანონის შედეგად კანდიდატების შერჩევით", - განაცხადა ჩუგოშვილმა.
ცნობისთვის, ბიძინა ივანიშვილმა დღეს განცხადება გაავრცელა, სადაც აღნიშნულია, რომ გაუგებარი იყო ეკა ბესელიას განცხადება, როდესაც მან კომიტეტის თავმჯდომარის თანამდებობის დატოვება მოსამართლეების არჩევის საკითხს დაუკავშირა.
