ორშაბათს ვისაუბრებ და ნათელს მოვფენ ყველაფერს, - ამის შესახებ უმრავლესობის წევრმა ეკა ბესელიამ პარტია „ქართული ოცნების“ ლიდერის ბიძინა ივანიშვილის განცხადებასთან დაკავშირებით აღნიშნა.
მისი თქმით, ის დარწმუნებულია, რომ საზოგადოება სიმართლეს გაიგებს.
„რა სიმბოლურია, რომ ახლა ვიმყოფები ევროსასამართლოს მოსამართლეთა არჩევის ევროსაბჭოს საპარლამენტო კომიტეტის სხდომაზე, სადაც სტრასბურგის მოსამართლეთა შერჩევაზე უნდა ვიმსჯელოთ და საქართველოში ვერ ვთანხმდებით, რომ უნდა არსებობდეს გამართული სტანდარტები და კრიტერიუმები. რაც შეეხება განცხადებას, რაც გავრცელდა პარტიის თავმჯდომარის სახელით, ორშაბათს ვისაუბრებ და ნათელს მოვფენ ყველაფერს. მე დარწმუნებული ვარ, საზოგადოება სიმართლეს გაიგებს და დარწმუნებული ვარ ამ ბრძოლის სიმართლეშიც“, - განუცხადა ეკა ბესელიამ საზოგადოებრივ მაუწყებელს.
ცნობისთვის, ბიძინა ივანიშვილმა დღეს განცხადება გაავრცელა, სადაც აღნიშნულია, რომ გაუგებარი იყო ეკა ბესელიას განცხადება, როდესაც მან კომიტეტის თავმჯდომარის თანამდებობის დატოვება მოსამართლეების არჩევის საკითხს დაუკავშირა.
