შარშან კონკრეტული დეპუტატები გარკვეული წესების დარღვევის გამო პოლიტსაბჭოს მიღმა აღმოჩნდნენ, დღეს იგივე მოცემულობა გვაქვს, – ამის შესახებ ჟურნალისტებს პარლამენტის თავმჯდომარე ირაკლი კობახიძემ განუცხადა.
მისი თქმით, იყო შემთხვევები, როცა კონკრეტულ დეპუტატს მმართველი გუნდის წევრების შეხვედრიდან მცხადი ინფორმაცია გაჰქონდა.
„კონკრეტულ გვარებზე საუბარი არ მინდა. იყო რამდენიმე განცხადება სხვადასხვა დეპუტატის მხრიდან, სადაც მაგალითად ტყუილი ითქვა, არასწორად გამოიტანეს ინფორმაცია, ყვებოდნენ რა ხდებოდა კონკრეტულ შეხვედრებზე. რეალურად კი, ტყუილი ითქვა, რაც წესების დარღვევაა.
შარშანაც იყო კონკრეტული სირთულეები და პრობლემები, მათ შორის გახსოვთ, რომ მაშინ იქნა მიღებული კონკრეტული გადაწყვეტილებები პოლიტსაბჭოსთან დაკავშირებითაც. კონკრეტული დეპუტატები აღმოჩნდნენ პოლიტსაბჭოს მიღმა სწორედ იმის გამო, რომ გარკვეული წესები დაარღვიეს. დღეს გვაქვს იგივე მოცემულობა, სასამართლოსთან არც მაშინ იყო და არც დღეს არის კავშირში ეს ყველაფერი, რაც უმრავლესობის შიგნით ხდება. პრობლემები რთული არ არის და მოგვარებადია“, – განაცხადა კობახიძემ.
