„ქართული ოცნების“ გუნდი ერთიანია, რომელსაც ჰყავს ლიდერი და თუ საუბარია პერსონიფიცირებაზე, ეს არის ბიძინა ივანიშვილის გუნდი, არავის ვურჩევ ამ გუნდის წინააღმდეგ წასვლას, – ამის შესახებ პარლამენტის თავმჯდომარე ირაკლი კობახიძემ ჟურნალისტებს გუნდში არსებულ დაპირისპირებასთან დაკავშრებით განუცხადა.
კობახიძემ კიდევ ერთხელ განმარტა, რომ ეკა ბესელიასთან დაკავშირებით გადაწყვეტილება აგვისტოში მიიღეს, როცა უზენაესი სასამართლოს მოსამართლეთა საკითხი აქტუალური საერთოდ არ ყოფილა.
„ჩვენ ახლა იმ კაბინეტის წინ ვდგავართ, რომელიც გამზადებული იყო ეკა ბესელიასთვის და რომლის მომზადებაც სექტემბერში დაიწყო, გამომდინარე აგვისტოში მიღებული გადაწყვეტილებიდან. აგვისტოში საერთოდ არ იყო აქტუალური სასამართლოს თემა. ეს გადაწყვეტილება კავშირში არ იყო სასამართლოს თემასთან“, – განაცხადა კობახიძემ, რომელმაც აქვე აღნიშნა, რომ ეკა ბესელიასთვის ვიცე-სპიკერის თანამდებობის შეთავაზებაზე საუბარი დღევანდელ მოცემულობაში ზედმეტია.
მისივე თქმით, შარშან ამაზე მეტი სირთულე იყო მმართველ გუნდში, რომელიც ერთი დეპუტატის გარიცხვით დასრულდა და კობახიძე არ გამორიცხავს, რომ ამ შემთხვევაშიც ასეთი გადაწყვეტილების მიღება გახდეს საჭირო.
„ყველას მოვუწოდებ, მთავარია, შეცდომები არ დაუშვან. ხშირად ადამიანები ემოციურ ფონზე უშვებენ ხოლმე შეცდომებს. ამას ვხედავთ კონკრეტული დეპუტატებისგანაც. გუნდის რღვევაზე საუბარი არის ზედმეტი. შარშან ამაზე მეტი სირთულე იყო, ეს დასრულდა ერთი დეპუტატის გარიცხვით პარტიიან, თუმცა ეს არ ნიშნავდა გუნდის რღვევას. არის თეორიული რისკი იმისა, რომ შეიძლება, მოგვიწიოს ამ შემთხვევაშიც ასეთი გადაწყვეტილების მიღება, თუმცა ასეთი ერთეული შემთხვევები „ქართული ოცნების“ გუნდის რღვევას არ ნიშნავს“, – აღნიშნა ირაკლი კობახიძემ.
