საქართველოს პრემიერ-მინისტრმა და გერმანიის კანცლერმა საქართველო-გერმანიის ეკონომიკური თანამშრომლობის გეგმებიც განიხილეს. როგორც მამუკა ბახტაძემ გერმანიის ფედერალურ კანცლერთან ანგელა მერკელთან შეხვედრის შემდეგ განაცხადა, საქართველო დაინტერესებულია უფრო მეტი გერმანული ინვესტიცია მოიზიდოს.
„ჩვენ მივესალმებით საქართველოში ყველა გერმანული კომპანიის საქმიანობას. წარმატებულ პროექტებთან ერთად, გვაქვს სურვილი ავითვისოთ ორმხრივი ეკონომიკური თანამშრომლობის პოტენციალი, უფრო მეტი გერმანული ინვესტიცია მოვიზიდოთ საქართველოში. და მსხვილი გერმანული კომპანიების პარალელურად განვავითაროთ ურთიერთობა მცირე და საშუალო ბიზნესს შორის. საქართველოს აქვს პოტენციალი იქცეს კარიბჭედ და რეგიონალურ ჰაბად ცენტრალური აზიის იმ ქვეყნებისთვის, რომლებსაც არ გააჩნიათ ზღვაზე გასასვლელი. აქედან გამომდინარე ეს არის გერმანული კომპანიებისათვის უნიკალური საშუალება და პერსპექტივა გაზარდონ ვაჭრობა საქართველოსთან არამედ რეგიონთან“, - განაცხადა მამუკა ბახტაძემ.
პრემიერის თქმით, მნიშვნელოვანია, რომ ფედერალურ კანცლერთან ერთად საქართველოში იმყოფებიან გერმანული კომპანიების წარმომადგენლები, რაც კიდევ ერთხელ ცხადყოფს, რომ სულ უფრო მეტად იზრდება ინტერესი ჩვენი ქვეყნის ეკონომიკური პოტენციალისა და შესაძლებლობების მიმართ.
„ჩემთვის განსაკუთრებით საამაყოა, რომ იმ პერიოდში, როდესაც საქართველოს რკინიგზას ვხელმძღვანელობდი, ხელი მოეწერა საქართველოს რკინიგზასა და ,,დოიჩე ბანს“ შორის ხელშეკრულებას, რომლითაც თანამშრომლობა მათ შორის ახალ ეტაპზე გადავიდა. ,,დოიჩე ბანი“ დღეს საქართველოს რკინიგზის ოფიციალური პარტნიორია, რაც იმას ნიშნავს, რომ საქართველოს რკინიგზამ სანდო და ძლიერი პარტნიორი შეიძინა ევროკავშირის ტერიტორიაზე“, განაცხადა მამუკა ბახტაძემ.
