„დალიე ლუდი და აზარტულ თამაშებში ჩაგითრევ“, - დაახლოებით ასეთია შინაარსია სს „არგოს“ მიერ წარმოებულ კამპანიაში, რომლის ფარგლებშიც ლუდისმწარმოებელი მომხმარებელს ლუდის შეძენის შემთხვევაში ე.წ. ფრიბეთებს სთავაზობს.
სს "არგო" აზარტული თამაშების ე.წ. ფრიბეთების გათამაშებას ისე ანახორციელებს, რომ ფინანსთა სამინისტროდან შესაბამისი ნებართვა არ აუღია. დღეის მდგომარეობით შემოსავლების სამსახურის ერთიანი ელექტრონული ბაზის უწყებრივ-სანებართვო რეესტრის მონაცემებით, სს „არგოზე“ „ლატარიების, აზარტული და მომგებიანი თამაშობების მოწყობის შესახებ“ საქართველოს კანონით დადგენილი სათამაშო ბიზნესის არც ერთი სახეობის ნებართვა გაცემული არ არის.
ამის მიუხედავად, კომპანიაში ამბობენ, რომ ყველაფერი წესრიგშია. თუმცა სს "არგოს" მარკეტინგის დირექტორის შორენა ჩაჩუას დაპირების მიუხედავად, რომ კონკრეტულ შეკითხვებზე პასუხს წერილობით გაგვცემდა, ჯერჯერობით არ მიგვიღია.
კანონში ვკითხულობთ, რომ “წამახალისებელი გათამაშების მოწყობის ნებართვა გაიცემა კონკრეტული სახის პროდუქციის (მომსახურების) მწარმოებელზე, ან მის წარმომადგენელზე, გარდა საქართველოს მთავრობის მიერ დადგენილი შემთხვევისა”.
ცხადია, "არგოს" გათამაშებისთვის საქართველოს მთავრობა რაიმე სპეციალური დადგენილებისათვის მსჯელობას არ გამართავდა. მით უფრო, როცა ე.წ. ფრიბეთები აზარტულ თამაშებს უკავშირდება. ამასთანავე, კომპანია "არგომ" ვერც შესაბამისი ნებართვა/დადგენილება წარმოადგინა და არც ჩვენს შეკითხვებს უპასუხა.
რა სახის სანქცია შეიძლება გავრცელდეს მასზე, ამაზე კომპეტენტურმა უწყებამ უნდა იმსჯელოს, თუმცა, კანონის ორაზროვნების, ან უბრალოდ, მისი გვერდის ავლით, კომპანია ე.წ. ფრიბეთებით, ლუდის მომხმარებლებს აზარტული თამაშებისკენ უბიძგებს. გათამაშებაში, ცხადია, საგანგაშო არაფერია, თუმცა აზარტული თამაშებით დაზარალებულთა და დამოკიდებულთა შედეგები საგანგაშოა.
დაშვების თეორიას თუ გავყვებით, ვთქვათ, კომპანია "არგოს" შესაბამისი ნებართვა მიეღო, ან უფრო მეტიც, მისი ამ წამახალისებელი გათამაშებისათვის, საქართველოს მთავრობას ემსჯელა (ისე როგორც კანონში წერია) და შესაბამისი დადგენილებაც მიეღო, კომპანია "არგო", კანონში ნაკლებად დომინირებული მორალური ასპექტებით, რის/ვის ხარჯზე ცდილობს მეტი ლუდის გაყიდვას? მაშინ როცა, დიდი და მსხვილი კომპანიები, სოციალურ და კულტურულ პროექტებში მონაწილეობისთვის სოლიდურ თანხებს იხდიან.
ცნობისთვის, კომპანიამ გათამაშება 2018 წლის 12 ივნისს დაიწყო და 30 სექტემბრამდე გრძელდება.
სს "არგომ" მის მიერ წარმოებულ ლუდ "ჰერცოგის" თავსახურავებში ჩადო ფრიბეთები. მომგებიანი კოდის აღმოჩენის შემთხვევაში, მომხმარებელს შეეძლო კოდის რეგისტრაცია "აჭარაბეთის" ვებსაიტზე თამაშობისთვის სპეციალურად გამოყოფილ ფანჯარაში.
რაოდენობა: ფრიბეთი 1 - 49 000 ცალი, ფრიბეთი 5 - 10 000 ცალი, ფრიბეთი 10 - 1 000 ცალი. ქულა 10 (10 თეთრი ფრიბეთის ექვივალენტი) 280 000 ცალი, ქულა 20 (20 თეთრი ფრიბეთის ექვივალენტი) 300 000 ცალი, ქულა 30 (30 თეთრი ფრიბეთის ექვივალენტი) 160 000 ცალი, ქულა 50 (50 თეთრი ფრიბეთის ექვივალენტი) 200 000 ცალი.
კომპანიის განმარტებით, ყველა ბოთლის თავსახურში არის 10-ნიშნა უნიკალური კოდი, რომელსაც წინასწარ აქვს განსაზღვრული შესაბამისი პრიზი.
"მომგებიანი კოდის აღმოჩენის შემთხვევაში, მომხმარებელს შეუძლია კოდის რეგისტრაცია "აჭარაბეთის" ვებსაიტზე თამაშობისთვის სპეციალურად გამოყოფილ ფანჯარაში. მომხმარებელი კოდის დარეგისტრირების შემდგომ იგებს ფრიბეთებსა და ქულებს. მომხმარებელს შეუძლია დააგროვოს ქულები და გადაცვალოს ფრიბეთში მისთვის სასურველ ნებისმიერ დროს", - ნათქვამია კომპანიის სარეკლამო განცხადებაში.
