„ხორავას ქუჩის“ საქმეზე შექმნილი საგამოძიებო კომისიის კომისიის წევრი, მმართველი გუნდის წარმომადგენელი, ეკა ბესელია, აცხადებს, რომ „ძალიან მნიშვნელოვანია, რომ პოლიტიკოსებმა, ვინც ამ კომისიის წევრები ვართ, გავითვალისწინოთ, რომ სხდომა პირდაპირ ეთერში გადაიცემა და პრაქტიკულად მასალების გასაჯაროება ნაწილობრივ მაინც ხდება და ეს საქმე სააპელაციო სასამართლომ უნდა განიხილოს, შეფასებები მტკიცებით ფორმაში არ გავაკეთოთ ხოლმე და ამით პოლიტიკოსების მხრიდან ერთგვარად სასამართლოზე ზეწოლა არ მოხდეს“. ამის შესახებ განცხადება ეკა ბესელიამ საგამოძიებო კომისიის დღევანდელი სხდომის დასრულების შემდეგ გააკეთა.
„რაც შეეხება შეფასებას, ყველაფერს, ალბათ, ბოლოს შევაფასებ. ერთი იმას ვიტყვი, რომ ყველა კითხვა დაისვა და ყველა კითხვაზე პასუხი მივიღეთ. ჩემთვის მნიშვნელოვანი იყო, ხომ არ იყო ისეთი გარემოება სხვა პირის ბრალდების წარდგენის საფუძველს ქმნიდა და არ წარუდგინეს იმიტომ, რომ სასამართლოს უფრო მაღალი სტანდარტი აქვს და ასეთი მტკიცებულებები საკმარისი არ იქნებოდა. პროკურორებმა თქვეს, რომ ასეთი გარემოებები არ იყო და მათ შორის იმ კითხვებს უპასუხეს, რომელიც ერთ-ერთი არასრულწლოვნის მიმართ რეკომენდაციის სახით იყო მიღებული,” - განაცხადა ეკა ბესელიამ.
დღეს კომისიამ დადანუაშვილისა და სარალიძის მკვლელობის საქმეზე მთავარი პროკურატურის შინაგან საქმეთა სამინისტროს გენერალურ ინსპექციაში, ცენტრალური კრიმინალური პოლიციის დეპარტამენტსა და საპატრულო პოლიციის დეპარტამენტში გამოძიების საპროცესო ხელმძღვანელობის დეპარტამენტის უფროსის, გიორგი გაბოძეს და მთავარი პროკურატურის სახელმწიფო უსაფრთხოების სამსახურში, სახელმწიფო დაცვის სპეციალურ სამსახურში, დაზვერვის სამსახურში და შინაგან საქმეთა სამინისტროს სახელმწიფო საქვეუწყებო დაწესებულება - სასაზღვრო პოლიციაში გამოძიების საპროცესო ხელმძღვანელობისა და ოპერატიულ-სამძებრო საქმიანობაზე ზედამხედველობის დეპარტამენტის უფროსის, მიხეილ შაყულაშვილის, ოფიციალური ახსნა-განმარტებები მოისმინა.
