Financial Times-ის ინფორმაციით, ორი ტანკერმა, რომლებსაც რუსული დიზელის საწვავი აშშ-ში უნდა ჩაეტანათ, მარშრუტიდან გადაუხვია. გამოცემის ცნობით, ეს შესაძლოა, აშშ-ის პრეზიდენტ დონალდ ტრამპსა და რუსეთის პრეზიდენტ ვლადიმირ პუტინს შორის მიღწეული შეთანხმების ჩაშლაზე მიუთითებდეს.

ტანკერების მარშრუტების შეცვლა იმ ფონზე ხდება, როდესაც აშშ-ში დიზელის მარაგები ბოლო 20 წელზე მეტი ხნის განმავლობაში ყველაზე დაბალ ნიშნულამდე შემცირდა.

გამოცემის ცნობით, საუბარია ორ გემზე - Talisman-სა და Leruo-ზე, რომლებიც თავდაპირველად აშშ-ის ატლანტიკური სანაპიროსკენ მიემართებოდნენ.

რუსული ტანკერი Talisman, რომელიც აშშ-ის, დიდი ბრიტანეთისა და ევროკავშირის სანქციების ქვეშაა, ატლანტის ოკეანიდან ხმელთაშუა ზღვაში შევიდა და ამჟამად ალჟირის სანაპიროსთან იმყოფება. გემი დანიშნულების ადგილად მიუთითებს სტატუსს „შეკვეთას ელოდება“, რაც იმას ნიშნავს, რომ ტვირთის საბოლოო მყიდველი ან დანიშნულების პორტი ჯერ განსაზღვრული არ არის.

მეორე ტანკერმა, Leruo-მ, რომელიც ჰონგ-კონგის კომპანიის საკუთრებაა და სიერა-ლეონეს დროშით დაცურავს, 2 ნოემბერს დანიშნულების ადგილი შეცვალა და აშშ-ის ნაცვლად ბრაზილია მიუთითა. გემი დიდი ბრიტანეთის, ევროკავშირისა და კანადის სანქციების ქვეშაა.

ამასთან, მესამე ტანკერი - ბერძნული კომპანიის საკუთრებაში არსებული Agioi Fanendes, კვლავ ნიუ იორკისკენ მიემართება, თუმცა მასაც საბოლოო დანიშნულების პორტი ჯერ არ დაუდასტურებია. გემს დაახლოებით 40 000 ტონა რუსული დიზელი გადააქვს.

სასაქონლო ბაზრების ანალიტიკური კომპანიის Kpler-ის ანალიტიკოსის, მეტ სმიტის განცხადებით, აშშ-ისკენ მიმავალი რუსული დიზელის სამი ტვირთიდან ორმა უკვე შეცვალა მიმართულება.

მისივე შეფასებით, ამერიკელი მყიდველები გარიგებაში მონაწილეობას ერიდებიან სამართლებრივი, მარეგულირებელი და სანქციებთან დაკავშირებული რისკების გამო.

გარიგებას აშშ-შიც მოჰყვა პოლიტიკური წინააღმდეგობა. ნიუ-ჯერსის გუბერნატორმა მიკი შერილმა პორტებისა და ტერმინალების ოპერატორები გააფრთხილა, რომ რუსული დიზელის მიღების შემთხვევაში შესაძლოა, მილიონობით დოლარის ოდენობის ჯარიმები დაეკისროთ.

Financial Times-ის ცნობით, აშშ-ის დიზელის მარაგები 100 მილიონ ბარელზე ქვემოთ დაეცა, რაც ბოლო ორ ათწლეულზე მეტი ხნის განმავლობაში პირველი შემთხვევაა.

შეგახსენებთ, რომ ტრამპმა და პუტინმა რუსული დიზელის აშშ-ისა და გლობალურ ბაზრებზე მიწოდების შესახებ შეთანხმება 9 ოქტომბერს გამართული სატელეფონო საუბრის შემდეგ გამოაცხადეს. ტრამპის განცხადებით, რუსეთს თავდაპირველად 300 000 ტონა დიზელი უნდა მიეწოდებინა, ნოემბერში კი დამატებით 500 000 ტონა, რასაც შემდგომში კიდევ უფრო დიდი მოცულობის მიწოდება უნდა მოჰყოლოდა.