ევროსაბჭოს საპარლამენტო ასამბლეის ვიცე-პრეზიდენტი, ლატვიის სეიმის დეპუტატი ანდრის ბერზინიში აცხადებს, რომ ევროპაში ე.წ. სამხრეთ ოსეთისადმი დამოკიდებულება იცვლება. ინფორმაციას ამის შესახებ ოსური მედია ავრცელებს.
მათი მტკიცებით, აღნიშნული განცხადება ანდრის ბერზინიშმა "PRO100TV"-ს ეთერში გააკეთა.
"ვფიქრობ, რომ ამ კონფლიქტის ანალიზი ორ ნაწილად იყოფა. ერთი - არსებითი და მეორე - პოლიტიკური. ყველაზე საშინელი კი არის ის, რომ ამ კონფლიქტში ხალხი დაზარალდა. ვფიქრობ - ეს არის მკაცრი გაკვეთილი იმისა თუ როგორ არ უნდა გადაიჭრას პრობლემები", _ განაცხადა ლატვიის სეიმის დეპუტატმა.
ანდრის ბერზინიში ასევე აცხადებს, რომ ევროპაში ორი წლის განმავლობაში დამოკიდებულება ე.წ. სამხრეთ ოსეთში მომხდარ ომთან მიმართებაში შეიცვალა, თუმცა "ევროპელთა უმეტესი ნაწილი კიდევ მხარს უჭერს საქართველოს".
"ევროპელების დამოკიდებულება ომის მიმართ იცვლება მაგრამ არა უცბად. ვფიქრობ, პროპორცია ამჟამად ასეთია 80% 20%-ზე. ანუ საქართველოს მხარეს ევროპელების 80%-ია რუსეთის მხარეს კი 20%", _ აცხადებს ანდრის ბერზინიში.