ამ წუთებში, თბილისის საქალაქო სასამართლოში ხორავას ქუჩაზე მოზარდებს შორის მომხდარი მკვლელობის საქმის განხილვა 51-ე საჯარო სკოლის მოსწავლის გამოკითხვით მიმდინარეობს.
პროკურორი ზვიად ფხაკაძე, ჟურნალისტებთან კვლავ კატეგორიულად გამორიცხავს მოწმეების ვინმეს მიერ დატრენინგებას.
„მოწმეებს მე არ ვამეცადინებ და არც ანალოგიური შინაარსის ჩანაწერი ყოფილა გაჟღერებული. ყოველგვარ საფუძველს მოკლებულია დაცვის მხარის ნათქვამი, რომ მოწმეებს ვიღაც ტრენინგს უტარებს. ჩემთვის გაურკვეველია ასეთი ინფორმაცია საიდან მოდის. შესაბამისად კომენტარსაც ვერ გავაკეთებ. არანაირი ჩვენების შეცვლას ადგილი არ ჰქონია. თუ რამდენად შეიძლება მოწმის ჩვენებას სასამართლო დაერყრდნოს ეს სასამართლოს გადასაწყვეტია“ - განაცხადა ჟურნალისტებთან საუბრისას პროკურორმა ზვიად ფხაკაძემ.
როგორც ის განმარტავს დღევანდელ პროცესზე არასრულწლოვანი მოწმის გარდა კიდევ სამი მოწმე დაიკითხება.
„დღეს გაგრძელდება იმ მოწმის დაკითხვა, რომელიც გუშინ ვერ მოესწრო. გარდა ამისა, ბრალდების მხარე კიდევ სამი მოწის დაკითხვას გეგმავს. აღნიშნული მოწმეები, რომლებიც დღეს უნდა დაიკითხონ მნიშვნელოვანია. ისინი ფაქტის შემსწრე მომწმეები არიან და ხორავას #4-ში განვითარებული მოვლენების შესახებ ისაუბრებენ“ - განაცხადა ფხაკაძემ.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.