რაღაც წამიკითხავს, რაღაც მსმენია და ისტორიიდან ყველამ ვიცით, რომ ჭირისუფლის მიერ თავისი მიცვალებულის მოპარვის ფაქტიც არსებობს, მაგრამ არ მსმენია, პატარა ბავშვები აქციაზე გამოიყვანო და აძახებინო, ცხედარი არ უნდა წაიღოს ჭირისუფალმა, – ასე გამოეხმაურა საპარლამენტო უმრავლესობის წევრი ნუკრი ქანთარია ოკუპირებულ ცხინვაშილი გამართულ აქციას, სადაც აქციის მონაწილეებმა მოითხოვეს, არ გადაეცეს არჩილ ტატუნაშვილის ცხედარი ოჯახს.
მისი თქმით, ყველაფერი გასაგებია - პასუხისმგებლობაც და ის ტკივილიც, რაც ცხინვალში ოჯახებს თავიანთი დაკარგული შვილების გამოაქვთ, მაგრამ ამ ვითარებაში პატარა ბავშვებს ჩარევა მიუღებელია.
„ყველა ნორმალური, ქვეყანაზე მოფიქრალი ადამიანი შეშფოთებულია და ცხინვალის იზოლატორში ახალგაზრდა კაცის დაღუპვის გამო სამძიმარს გამოთქვამს. ამ ფაქტმა ჩვენი სასტიკი, უმწეო რეალობა კიდევ ერთხელ დაგვანახა, რომლის წინაშეც აღმოვჩნდით, როცა არ შეგიძლია, იქ ჩახვიდე და საქმე გამოიძიო. რაღაც წამიკითხავს, რაღაც მსმენია და ისტორიიდან ყველამ ვიცით, რომ ჭირისუფლის მიერ თავისი მიცვალებულის მოპარვის ფაქტიც არსებობს, მაგრამ არ მსმენია, პატარა ბავშვები აქციაზე გამოიყვანო და აძახებინო, ცხედარი არ უნდა წაიღოს ჭირისუფალმა. დე ფაქტო ხელისუფლებას მივმართავ, თქვე კაი ხალხო, ამ ბავშვებს ასეთ მდგომარეობაში რატომ აყენებთ და მეხსიერებას რატომ უზიანებთ? ჩვენ ხომ ყველა ამ წუთისოფელში დროებით ვართ, ყველაფერი ზემოთ აბარიათ და თქვენ ხომ იცით, რომ ეს ახალგაზრდები გაიზრდებიან, ბევრ რამეს წაიკითხავენ, თბილისში აუცილებლად ჩამოვლენ, თბილისის გავლით ევროპაშიც წავლენ და იქნებ, ამაზე ერთობლივად გვეფიქრა. ყველაფერი გასაგებია - პასუხისმგებლობაც და ის ტკივილიც, რაც ცხინვალში ოჯახებს თავიანთი დაკარგული შვილების გამოაქვთ, მაგრამ ამ ვითარებაში პატარა ბავშვებს ნუ ჩავრევთ“, –აღნიშნა ქანთარიამ.
ცნობისთვის, „არ გადასცეთ არჩილ ტატუნაშვილის ცხედარი ოჯახს“, - ამ სახელწოდებით ოკუპირებულ ცხინვალში აქცია გუშინ გაიმართა.