ქუთაისის მერია გეგმავს პარლამენტს მიმართოს უკანონო მშენებლობებზე, ნებართვის დარღვევასა და სხვა ტექნიკურ ხარვეზებზე ჯარიმები გამკაცრების მოთხოვნით.
როგორც ქუთაისის მერმა გიორგი ჭიღვარიამ ადგილობრივ მედიას(newpress)განუცხადა, საკითხზე მუშაობა მიმდინარეობს.
ამ დროისთვის სამშენებლო ნებართვის დარღვევისთვის ჯარიმა 500-დან 1000 ლარამდეა.
პარლამენტის ჯანდაცვის კომიტეტის თავმჯდომარის, აკაკი ზოიძის განმარტებით, "შრომის უსაფრთხოების შესახებ" კანონით სანქციები გათვალისწინებულია ყველგან ერთი ოდენობით, თბილისის მერიის მიმართვის საფუძველზე კი ჯარიმები იმ ტექნიკურ მიმართულებებზე განხორციელდა, რომელსაც თავად მუნიციპალიტეტი ახორციელებს.
მისივე თქმით, გარკვეული ხნის წინ შეხვდნენ რეგიონების წარმომადგენელებს, თუმცა იქ მსგავსი მოთხოვნა არავის ჰქონდა.
"შრომის უსაფრთხოების კუთხით ჯარიმები და სანქციები არის ერთი და იგივე საქართველოს მთელ ტერიტორიაზე შრომის ინსპექციის უფლებამოსილების ქვეშ. თბილისის შემთხვევაში, საუბარია, დამატებით ინიციატივაზე, რომელიც იყო მაღალსართულიან კორპუსების და ტექნიკურად რთული შენობების მშენებლობაზე, რადგან თბილისში მწვავედ დგას ეს საკითხი, ქალაქის მერის მომართვის საფუძველზე ცვლილება შევიდა იმ ნაწილში, რომელსაც თავად მერიის ზედამხედველობის სამსახურის ახორციელებს. ეს არის, როგორც უნებართვო მშენებლობა, ასევე ნებართვის დარღვევა და სხვა საკითხები, რაც მიეკუთვნება ზედამხედველობას. მერიამ ჩათვალა საჭიროდ, მსგავსი სიმკაცრის სანქციები ყოფილიყო იმ საკითხებზე, რაც მიეკუთვნება მერიის კომპეტენციას"-განაცხადა აკაკი ზოიძემ და დასძინა, რომ თუ თვითმმართველი ქალაქების წარმომადგენლები მოითხოვენ, მათ მუნიციპალიტეტში მსგავს სანქციებს, ამ შემთხვევაში, შესაძლებელია, პარლამენტმა ცვლილებას მხარი დაუჭიროს და ცვლილება შეიტანონ კანონმდებლობაში, რომელიც არეგულირებს შესაბამის ქალაქებში ტექნიკური ზედამხედველობის ინსპექტირებას. დეპუტატის განცხადებით, მერიამ ამის დასაბუთებაც უნდა მოახდინოს.
