- საზოგადოება 24 იანვარი 2018, 18:04
ბაღი კვების რაციონს ყველა ბავშვის გემოვნებას ვერ მოარგებს - ბავშვთა ენდოკრინოლოგი
2018 წლის 1 იანვრიდან ბაგა-ბაღებში კვების ახალი სტანდარტი ამოქმედდა. საბავშვო ბაღის აღსაზრდელების მენიუ სეზონების მიხედვით იცვლება. საკვები რაციონში მოიმატა ცილოვანი პროდუქტების რაოდენობამ(ხორცი, თევზი, ყველი და რძის სხვა პროდუქტები) და შემცირდა ბავშვთა ჯანმრთელობისთვის მავნე პროდუქტების, მათ შორის მარილისა და შაქრის დღიური ნორმა, ასევე, სხვა ნებისმიერი საკონდიტრო ნაწარმის მოხმარება, რომელიც 15%-ზე მეტ ცხიმს შეიცავს.
კვების ახალ სტანდარტს აპროტესტებს მშობელთა ნაწილი, ისინი აღნიშნავენ, რომ ბავშვების მენიუ ერთფეროვანი საკვებითაა დაკომპლექტებული, შესაბამისად, ზოგიერთი აღსაზრდელი არ მიირთმევს შეთავაზებულ პროდუქტს და კვების გარეშე რჩება.
ბავშვთა ენდოკრინოლოგ მაია ბალახაძის შეფასებით, მთავარია, ბავშვის კვება იყოს დაბალანსებული და კალორაჟის ასაკობრივ ნორმას აკმაყოფილებდეს.
მისივე განმარტებით, ბაღში, როგორც წესი, თითო კვებისთვის, ერთი ან ორი სახეობის კერძი მზადდება და რთულია, ყველა ბავშვის გემოვნებას მოერგოს.
“წარმოუდგენელია, ბაღმა კვების რაციონი 30 ბავშვის გემოვნებას მოარგოს, პრობლემა სწორედ ის არის, რომ ჯგუფებში უფრო მეტი აღსაზრდელია, ვიდრე უნდა იყოს. რაც შეეხება კონკრეტული პროდუქტების ამოღებას მენიუდან, ბავშვისთვის არ არის სასურველი ფუნთუშის, დიდი რაოდენობით შოკოლადისა და მსგავსი საკვების მირთმევა და ძალიან კარგია თუ ხილით და ბოსტნეულით, ასევე, ნახშირწყლებით, ბურღულეულით(წიწიბურა, შვრია ბრინჯი), ცილებითა და ბავშვის კვებისთვის შესაბამის ცხიმით ჩანაცვლდება არაჯანსაღი პროდუქტები. არ არის სასურველი, რომ ბავშვმა მიიღოს ტკბილი სასმელები, უჯერი ცხიმები, როგორიცაა მარგარინი და ა.შ“, - განუცხადა „ჯი-ეიჩ-ენს“ მარიამ ბალახაძემ.
გაეროს ბავშვთა ფონდის (Unicef Georgia) განმარტებით, განმარტებით, ადრეულ ასაკში ბავშვის ჯანსაღ კვებას უდიდესი გავლენის მოხდენა შეუძლია მის მომავალზე. სწორედ ამიტომ, მნიშვნელოვანია დავიცვათ ჯანსაღი კვების ზოგადი პრინციპები.
ბავშვის ჯანმრთელი, დაბალანსებული კვებითი რაციონი უნდა შეიცავდეს:
✅ ხილსა და ბოსტნეულს;
✅ სასმელ წყალს;
✅ ცილოვან პროდუქტებს (ხორცი, თევზი, კვერცხი, ლობიო და ა.შ.);
✅ რძესა და რძის ნაწარმს;
✅ მცირე რაოდენობით ცხიმის, მცირე რაოდენობით მარილისა ან შაქრის შემცველ საკვებსა და სასმელს.
აღსანიშნავია, რომ 18 იანვარს თბილისის მერი კახა კალაძე ბაგა-ბაღების კვების რაციონთან დაკავშირებულ ბრალდებებს გამოეხმაურა და საბავშვო ბაღების აღსაზრდელთა მენიუ გაასაჯაროვა და განაცხადა, რომ ტყუილია, თითქოს მერიამ შეამცირა საბავშვო ბაღების აღსაზრდელებისთვის განკუთვნილი კვების მენიუ.
მისივე თქმით, გაეროს ბავშვთა ფონდი დიდი ხანია აღნიშნავს, რომ საქართველოში ბაგა-ბაღების მენიუს მიხედვით გათვალისწინებული კალორაჟი არ შეესაბამებოდა ევროპულ სტანდარტებს.
„ახალი მენიუ საქართველოს მთავრობის 2017 წლის ოქტომბრის თვის დადგენილებით განსაზღვრული კალორაჟის ახალი ნორმის შესაბამისად, საერთაშორისო ნორმებისა და სტანდარტების შესაბამისად, ჯანდაცვის სპეციალისტების ჩართულობით დამტკიცდა. ის მოიცავს მთელი წლის განმავლობაში, სწავლის პერიოდში, აღსაზრდელების სამჯერად კვებასა და ერთ წახემსებას. რაციონში მოიმატა ცილოვანი პროდუქტების რაოდენობამ, მათ შორის ხორცის, თევზის, ყველისა და რძის პროდუქტებმა და შემცირდა ბავშვთა ჯანმრთელობისთვის მავნე პროდუქტები, მათ შორის მარილისა და შაქრის დღიური ნორმა. ჩვენ, რა თქმა უნდა, ვერ დავუშვებთ პოლიტიკურ სპეკულაციებს ისეთ სასიცოცხლოდ მნიშვნელოვან საკითხზე, რომელიც ეხება ჩვენი შვილების ჯანმრთელობას. აქ მთავარ სიტყვას ამბობენ სპეციალისტები და ჩვენ ვალდებულები ვართ ზედმიწევნით დავიცვათ მათი რეკომენდაციები“, - განმარტა კახა კალაძემ.
გთავაზობთ მენიუს გეგმის ერთ-ერთ ნიმუშს:
ავტორი: . .
