„სასტუმროც დაინტერესებულია ხანძრის მიზეზების დადგენით და აღმოფხვრით. რამდენიმე კომპანიასთან ვაწარმოებთ მოლაპარაკებებს, რომლებიც ხანძრის გამომწვევ მიზეზებზე ექსპერტიზის ჩატარებას შეძლებენ“, - განაცხადა „ჯი-ეიჩ-ენთან“ სასტუმრო „ლეოგრანდის“ იურისტმა, კახა წერეთელმა.
თუ რომელი ქვეყნის ექსპერტებზეა საუბარი, ამის დასახელებისგან ადვოკატი თავს იკავებს. „რამდენიმე მიმართულებით, რა თქმა უნდა, ამ საქმეში კვალიფიციურ სპეციალისტებს ვეძებთ“, - აღნიშნა წერეთელმა.
რატომ გახდა საჭირო სხვა ქვეყნის ექსპერტების საქმეში ჩართვა აუცილებელი და ხომ არ მიანიშნებს ეს იმაზე, რომ ისინი გამოძიებას უნდობლობას უცხადებენ, იურისტი აცხადებს, რომ დამოუკიდებელი ექსპერტების ჩართვით გამოძიებას ხელს უწყობენ.
„გამოძიებას ვენდობით, მაგრამ ყველა დეტალი გვაინტერესებს. სასტუმროს აქვს უფლება, ინფორმაციები მოიძიოს, რა ინფორმაციასაც მოვიძიებთ, ყველაფერს გამოძიებას გადავცემთ. ამას როგორც გამოძიებასთან თანამშრომლობას და მათთვის ხელშეწყობას, ასე ვყურებთ. ამ ეტაპზე გამოძიება ჩვეულ რეჟიმში მიმდინარეობს, კვლავ გრძელდება თანამშრომლების დაკითხვა, რათა მომხდარის სურათი სრულად იქნეს აღდგენილი. სასტუმროს მფლობელი ჯერ არ გამოკითხულა, თუმცა, როგორც კი მას დაიბარებენ, საგამოძიებო უწყებაში გამოცხადდება. მომხდართან დაკავშირებით მას არანაირი ვერსია არ გააჩნია, სწორედ ამიტომ ვცდილობთ, რომ ექსპერტები მოვიძიოთ“, - აცხადებს კახა წერეთელი.
შეგახსენებთ, რომ ბათუმში, სასტუმრო "ლეოგრანდში" ხანძარი 24 ნოემბერს, დაახლოებით 20.00 საათზე გაჩნდა. ხაძრის შედეგად 11 ადამიანი, საქართველოს 10 მოქალაქე და ირანის რესპუბლიკის ერთი მოქალაქე დაიღუპა, ჰოსპიტალიზაცია კი 22 ადამიანს დასჭირდა.
მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა ან სხვა მძიმე შედეგი გამოიწვია.
