გორის რაიონულ სასამართლოში ბექა ხახუბიას გარდაცვალების საქმეზე ექსპერტ-ქიმიკოსი დაკითხეს. ამ წუთებში სასამართლოში შესვენებაა გამოცხადებული. თუ ვისი დაკითხვით განახლდება პროცესი, ეს დაცვის მხარისთვის უცნობია.
“ერთი მოწმე, ექსპერტ-ქიმიკოსი დაიკითხა, რომელმაც დაზიანებულ მანქანაზე კვლევა ჩაატარა. ამ მოწმის დაკითხვით ერთი რამ გაირკვა, რაც დაცვას აინტერესებდა - ავტომობილი მიკროსკოპულად არ იყო შემოწმეული და შეიძლებოდა შეჯახებამდე მასზე სხვა მანქანის საღებავის კვალიც ყოფილიყო, რაც ექსპერტმა ვერ აღმოაჩინა იმ მიზეზით, რომ მანქანის მიკროსკოპით დათვალიერება არ მოხდა.
ამ დასკვნით მტკიცდება, რომ ხახუბიას ავტომობილი ჯერ ევაკუატორს შეეჯახა, შემდეგ კი, სატვირთოს. დანარჩენ ექსპერტებს აღარ დავკითხავთ, რადგან მათი დასკვნა სადაოდ არ გვაქვს“, - განუცხადა „ჯი-ეიჩ-ენს“ ერთ-ერთი ბრალდებული სამართალდამცავის ადვოკატმა, ნოდარ ცინცაძემ.
შეგახსენებთ, რომ 21 წლის ბექა ხახუბია გორის გვირაბთან ავტოსაგზაოშემთხვევის დროს დაიღუპა. ის გადაჭარბებული სიჩქარით ნასვამ მდგომარეობაში მართავდა მანქანას და პატრულის მითითებას არ დაემორჩილა, რა დროსაც განხორციელდა მისი დევნა. გორის გვირაბის გასასვლელთან პატრულის თანამშრომლებმა გზა ტრაილერით ჩაკეტეს, რომლის წინ რამდენიმე მეტრში ევაკუატორი დააყენეს. დიდი სიჩქარით მოძრავი ბექა ხახუბია ჯერ ევაკუატორს დაეჯახა, შემდეგ კი ტრაილერს. ის ადგილზე გარდაიცვალა.
აღნიშნულთან დაკავშირებით, სამი პოლიციელია ბრალდებული.
