„რესპუბლიკური პარტია“ ბათუმში მომხდარი ტრაგედიის გამო მწუხარებას გამოთქვამს.
როგორც პარტიის მიერ გავრცელებულ განცხადებაშია აღნიშნული, ისინი მიიჩნევენ რომ, გამოძიება სწრაფად დაადგენს ხანძრის მიზეზებს და დაისჯება ყველა ის პირი თუ სამსახური, რომელთა პასუხისმგებლობაშიც შედიოდა სასტუმროს შენობის უსაფრთხოების სტანდარტებთან შესაბამისობაში ყოფნა და ამ სტანდარტების დაცვა.
"რესპუბლიკური პარტია მწუხარებას გამოთქვამს ბათუმში მომხდარი ტრაგედიის გამო. სასტუმრო „ლეოგრანდში“ გაჩენილ ხანძარს 11 ადამიანის სიცოცხლე შეეწირა.
ვუსამძიმრებთ დაღუპულთა ოჯახებს და ახლობლებს ხოლო ხანძრის შედეგად დაშავებულებს ვუსურვებთ სწრაფად გამოჯანმრთელებას.
იმედს ვიტოვებთ, რომ გამოძიება სწრაფად დაადგენს ხანძრის მიზეზებს და დაისჯება ყველა ის პირი თუ სამსახური, რომელთა პასუხისმგებლობაშიც შედიოდა სასტუმროს შენობის უსაფრთხოების სტანდარტებთან შესაბამისობაში ყოფნა და ამ სტანდარტების დაცვა. სასიცოცხლოდ მნიშვნელოვანია, მკაფიო საკანონმდებლო რეგულაციების შექმნა და მათი ეფექტიანად აღსრულება.
აქვე მადლობას ვუხდით მეხანძრეებსა და მაშველებს გაწეული სამსახურისთვის", - ნათქვამია განცხადებაში.
ცნობისთვის, საქართველოს შინაგან საქმეთა სამინისტროს ბოლო ინფორმაციით, ბათუმში, სასტუმრო "ლეო გრანდში" გაჩენილი ხანძრის შედეგად 11 ადამიანი, მათ შორის 10 საქართველოს, ხოლო 1 ირანის მოქალაქე დაიღუპა.
მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა ან სხვა მძიმე შედეგი გამოიწვია.
