ბათუმში, სასტუმრო „ლეო გრანდში“ მომხდარი უბედური შემთხვევის შედეგად 11 დაღუპულიდან 8 ლიფტში იპოვეს, 1 - აუზში, 2 კი, სასტუმროს სავარჯიშო დარბაზში.
როგორც ირკვევა, 11-ვე დაღუპული მამაკაცია, მათგან 10 საქართველოს, ხოლო 1 - ირანის რესპუბლიკის მოქალაქეა.
დაღუპულთა ახლობლების ინფორმაციით, არც ერთ მათგანს დამწვრობა არ ჰქონდა, ისინი კვამლისგან გაიგუდნენ.
მათივე ცნობით, ხანძრის გამო სასტუმროში ელექტროენერგია გაითიშა, ლიფტი გაიჭედა და ვეღარ გამოვიდნენ.
ცნობისთვის, საქართველოს შინაგან საქმეთა სამინისტროს ბოლო ინფორმაციით, ბათუმში, სასტუმრო "ლეო გრანდში" გაჩენილი ხანძრის შედეგად 11 ადამიანი, მათ შორის 10 საქართველოს, ხოლო 1 ირანის მოქალაქე დაიღუპა.
მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა ან სხვა მძიმე შედეგი გამოიწვია.
