წლის საუკეთესო ტელენოველად თურქული სერიალი „შენი ზოდიაქოს ფერი“ (Kara Sevda) აღიარეს. International Emmy Awards-ზე გამარჯვებული სერიალი ტელეკომპანია „რუსთავი 2“-ის ეთერში გადიოდა და საკმაოდ მაღალი რეიტინგი ჰქონდა.
როგორც ცნობილია, საერთაშორისო პრემია International Emmy Awards-ის დაჯილდოების ცერემონიალი 20 ნოემბერს ნიუ-იორკში გაიმართა.
პირველად Emmy Awards-ის ისტორიაში მასზე ნომინირებული იყო თურქული პროექტი, რომელმაც პირველივე ცდაზე გაიმარჯვა.
თურქული არხის Star TV-ის პროექტი "Kara Sevda", სადაც მთავარ როლებს ბურაკ ოზჩივიტი, ნესლიხან ათაგიული და ქაან ურგანჯიოღლუ თამაშობენ საკმაოდ წარმატებული აღმოჩნდა.
International Emmy Awards-ზე სერიალი "Kara Sevda" ნომინირებული იყო ნომინაციაში „წლის საუკეთესო ტელენოველა“ და როგორც Hollywood Reporter-ი იუწყება კანადურ და ბრაზილიურ პროექტებთან შედარებით დაწინაურდა და ის გამარჯვებულიც გახდა.
სერიალის სიუჟეტის მიხედვით, ქემალს პირველი სიყვარული მოულოდნელად ეწვია. ის პირველად საყვარელ გოგონას ტრანსპორტში შეხვდა, შემდეგ - გამოფენაზე და ბოლოს, მან ის დახრჩობას გადაარჩინა. გოგონა, რომელსაც ნიჰანი ჰქვია, მდიდარი ბიზნესმენის ქალიშვილია. ქემალი - ღარიბი დალაქის. ისინი რადიკალურად განსხვავებულ სამყაროებს ეკუთვნიან. აქვს კი რაიმე მომავალი მათ სიყვარულს, როცა ირგვლივ საშინელი ინტრიგები იხლართება? თუმცა ორივე ცდილობს საკუთარი სიყვარულის გადასარჩენად იბრძოლოს.
