ქართველი პოეტის, ჯანსუღ ჩარკვიანის დაკრძალვაზე "ეროვნულ-განმათავისუფლებელი" მოძრაობის წევრებმა პოეტის პანთეონში დაკრძალვა გააპროტესტეს.
ყოფილი პრეზიდენტის, ზვიად გამსახურდიას მომხრე ორმა ქალმა საპროტესტო პლაკატები გაშალა.
აღნიშნულის გამო, პანაშვიდზე მყოფმა პირებმა აღშფოთება გამოთქვეს და მათ პლაკატები წაართვეს.
მოძრაობის წევრებმა სტალინის დედის, ალექსანდრე გრიბოედოვის და ჭაბუა ამირეჯიბის მთაწმინდის პანთეონიდან გადასვენებაც მოითხოვეს.
აქციას ხმაური და დაპირისპირება მოჰყვა.
დაცვის სამსახურმა დემონსტრანტები პანთეონის ტერიტორიიდან ძალის გამოყენებით გაიყვანა.
დაკრძალვაზე სიტყვით გამოვიდა პოეტის ქალიშვილი თაკო ჩრკვიანი და აღნიშნა, რომ ჯანსუღ ჩარკვიანის მეუღლემ, მთელი ცხოვრება მიუძღვნა ძალიან დიდი მწერლის, კონსტანტინე გამსახურდიას შემოქმედებას.
"არა მგონია და არ დაიჯეროთ, რომ ეს ორი ქალბატონი ბატონ ზვიად გამსახურდიას მომხრეები იყვნენ. ისინი არ იყვნენ გამსახურდიას მომხრეები, გამსახურდიას ოჯახის პატივისმცემელი აქ ზის, ჯანსუღ ჩარკვიანის მეუღლე, რომელმაც მთელი ცხოვრება მიუძღვნა ძალიან დიდი მწერლის, კონსტანტინე გამსახურდიას შემოქმედებას. ამიტომ, მე მინდა ვთქვა, რომ ძლივს გაერთიანებული, ძლივს შეკოწიწებული საქართველო არ ჩაგვიშალონ. აქ არიან სრულიად სხვადასხვა აზრის მატარებლები და მეტი ამ კაცს და სამოციანელთა თაობასაც არაფერი არ უნდოდა. მეტს ესენი არაფერს არ ემსახურებოდნენ. კბილებით მოიტანეს. აი, ამათგან იცავდნენ, აღარ არიან ისინი, ორი ცალი დარჩა და ისიც აგერ ამოვიდნენ პანთეონში”, - განაცხადა თაკო ჩარკვიანმა.
მთაწმინდის პანთეონში ჯანსუღ ჩარკვიანს ოჯახი, ცნობილი ადამიანები და ხელისუფლების წარმომადგენლები იმყოფებოდნენ. მათ შორის იყო, საქართველოს ყოფილი პრემიერმინისტრი ბიძინა ივანიშვილი, მეუღლესთან ერთად.
