„იმ პერიოდში, როცა დავით შათირიშვილი დააკავეს, გოგა ონიანი სამმართველოს უფროსის მოადგილე იყო. უნდა გამოიკვლიონ, მისი ზემდგომი პირი შათირიშვილის დაკავებაში რაიმე სახით მონაწილეობდა თუ არა. წესით, უფროსს აღნიშნულის შესახენ უნდა სცოდნოდა“, - განუცხადა „ჯი-ეიჩ-ენს“ დავით შათირიშვილის ადვოკატმა, ალექსანდრე კობაიძემ.
ის მსჯავრდებულ გოგა ონიანთან ერთად იმ პირების პასუხისმგებაში მიცემას მოითხოვს, ვინც შათირიშვილის უკანონო დაკავებაში მოანწილეობა მიიღო. ის საბრალდებო სკამზე საქმის პროკურორის და გამომძიებლების დასმასაც არ გამორიცხავს.
„ეს არის სისტემური დანაშაული და კითხვებზე პასუხია გასაცემი. იმ პირების პასუხისმგებლობის საკითხი უნდა დადგეს, ვინც დავით შათირიშვილის დაკავებასა და წამლის ჩადებაში მონაწილეობა მიიღო. შეიძლება ყველაფერი ერთმა ადამიანმა დაგეგმა, მაგრამ მას ვიღაც ზემდგომი ეხმარებოდა.
კითხვის ნიშნებია იმ ადამიანების მიმართ, ვინც ჩხრეკა-ამოღება ჩაატარა. თუ პროკურორმა იცოდა, რომ წამალი ჩადებული იყო, შათირიშვილის ბრალი რატომ წაუყენა? თუ ერთი კონკრეტული ჩინოვნიკის მიმართ გამამტყუნებელი გაანაჩენი დადგა, იმედს გამოვთქვამ, რომ სხვების მიმართაც დადგება, თუ ამ საქმეში მათი რაიმე ფორმით მონაწილეობა დადასტურდება. თუ არადა, გააკეთონ განცხადება, რომ მათ ამ საქმეში მონაწილეობა არ მიუღიათ“, - აცხადებს კობაიძე.
შეგახსენებთ, რომ „ერთიანი ნაციონალური მოძრაობის“ წევრს, გიორგი ონიანს სასამართლომ 4 წლითა და 6 თვით თავისუფლების აღკვეთა შეუფარდა. გიორგი ონიანს ბრალი რამდენიმე მუხლით ჰქონდა წაყენებული, მათ შორის უკანონო დაკავების, სამსახურებრივი უფლებამოსილების გადამეტებისა და მტკიცებულებათა ფალსიფიკაციის ბრალდებით.
