ქალთა მოძრაობამ პარლამენტში სექსუალური შევიწროვების აკრძალვის მოთხოვნით პეტიცია შეიტანა.
პეტიციის, რომელსაც 1000 ხელმომწერი ჰყავს, მთავარი მოთხოვნაა, რომ სექსუალური შევიწროვების აკრძალვა კანონით მოხდეს.
"დღეს საქართველოში სექსუალური შევიწროვება არ არის დასჯადი ქმედება და არ განისაზღვრება დისკრიმინაციად. ჩვენ მოვითხოვთ, პარლამენტმა დაუყოვნებლივ მიიღოს საკანონმდებლო ცვლილებები.
საჯარო სივრცეში სექსუალური შევიწროვება მოიცავს: სექსუალური ხასიათის კომენტარებს, უხამს ხუმრობებს, მიშტერებას, სტვენას, ტელეფონის ნომრის ან შეხვედრის დაჟინებულ მოთხოვნას,რომელიც უარის შედეგადაც გრელდება. ასევე სხეულზე შეხება უნებართვოდ, გენიტალიების ჩვენება და სხვა.
სამუშაო ადგილას სექსუალური შევიწროვება ხშირად გამოიხატება სექსუალური შნაარსის არასასურველ კომპლიმენტებში, ხუმრობებში, პორნოგრაფიის ჩვენებაში, უფროსის მხრიდან სექსუალური ურთიერთობების მოთხოვნა დაწინაურების ან სამსახურიდან გაგდების სანაცვლოდ და სხვა", - აღნიშნულია პეტიციაში.
აღსანიშნავია, რომ ადამიანის უფლებათა დაცვის კომიტეტმა პარლამენტში წარდგენილი პეტიციის განხილვა მიზანშეწონილად ჩათვალა და შემდგომი მსჯელობისთვის გენდერულ საბჭოს გადაუგზავნა.
